नगर पालिक निगम के ब्रांड एम्बेसडर के सलाह
आज के स्तिथि म हर एक मनखे जऊन घर, दुकान, काम्प्लेक्स बनाये हे वो अपन छत ले वर्षा के पानी (जेला मिनरल वाटर ले घलोक शुद्ध बताए गए हे) ल सकेल के अउ वोला फिल्टर करके (फिल्टर के बहुत अकन अलग अलग तरिका हे) ओकर से बोरिंग ल रिचार्ज करना चाही या फेर जमीन म पिट बनाके वो पानी ल अपन क्षेत्र म ही भूगर्भ तक जाय देना चाही। बरसा जल ल व्यर्थ नाली म झन जाय देना चाही। एखर से सीधा-सीधा धरती के तरी भूगर्भ म पानी के लेबल बाढ़हि। एकर से आप ल अऊ आप मन के आस पास रहवइया कोनो ल भविष्य म पानी बर दिक्कत नइ आही। येकर बर हम सब झन ल जागरूक होके काम करना होही। निगम ल एखर मापदंड तय करके अब एला जागरूकता समझाइस अउ तहां ले शक्ति ले करवाना होही।
नगर पालिक निगम के ब्रांड एम्बेसडर अमिताभ भट्टाचार्य के कहना हे कि ए काम ल सिरिफ खानापूर्ति बार नइ भलुक ए वाटरहारवेस्टिंग के फोटो अउ वीडियो घलव बनाय जाए। उमन निवेदन करत कहिन कि प्राइवेट संस्था घलोक ये बात बर आगू आवयं अऊ मिलजुल के धरती के जल स्तर ल बढ़ाये के संघरा काम करंय।
शपथ फाउंडेशन, छ ग होटल अउ रेस्टाटेंट एशोशिएसन, छ ग ब्लड डोनर फाउंडेशन के सदस्य अमिताभ भट्टाचार्या ह नगर पालिका निगम भिलाई ल सलाह दीन के हर एक 2 ले 3 वार्ड या क्षेत्र ल मिलाके एक ओवर हेड पानी के टंकी बनाय जाये अऊ ओखर से घर म मीटर लगाके पानी के वितरण करे जाये, जेखर से बोरिंग के समस्या के घलोक निदान हो जाही। भविष्य म अऊ बोर करे के जरूरते नइ परही। एला नगर निगम पूरा मुश्तैदी अउ ईमानदारी के संग जागरूक ला के लागू करावय। उंकर कहना हे कि अभी नई चेतहु त भविष्य म पानी बर बहुत दिक्कत अवइया हे। पानी के संचयन के मर्म ल अब हरेक मनखे अउ प्रशासन ल समझना होही।
