अपन जिंदगी दांव म लगा के अमन ज्योति ह बचाईस संगवारी के जान

कोरबा जिला के अमन ज्योति ह अपन संगवारी ल बचाय बर अपन जिंदगी दांव म लगा देहे रहिस। ये घटना 01 अगस्त 2021 के हे। ये दिन फ्रेंडशिप डे रहिस। मंझनिया करीबन 02 बजे अपन एक संगी साहिल पैगवार के जन्मदिन मनाए बर 20 किलोमीटर दूरिहा पिकनिक स्पॉट परसाखेला बांध के झरना तीर पिकनिक मनाए गए रहिन। इही बीच कक्षा 12 वीं म पढईया एक छात्र आशीष ठाकुर, जलप्रपात के पहिली, किनारा म अपन हाथ-पैर धोए बर गीस। उहां चट्टान म पैर फिसले के सेती वो पानी के तेज धार म बोहाए लगिस। आगू गहीर खाई होए के सेती वोमें गिरे के खतरा रहिस। खतरनाक फिसलन चट्टान अऊ पानी के तेज धार म आशीष ल बोहात देख के सबो संगी डेरा गें। आशीष ल तैरना नइ आत रहिस लइका मन ह बचाओ-बचाओ चिल्लाए लगिन। अपन ले उमर म बड़े आशीष ल बचाय बर 15 बछर के छात्र अमन ज्योति ह पानी के तेज बहाव म कूद दीस। अमन ल घलोक तैरना नइ आत रहिस, फेरर वो ह ये सोचके कि संगी ल कइसनो करके बचाना हे, इही खातिर वो पानी म कूद दीस। पानी म चट्टान मन के बीच बोहत अपन संगी आशीष ल अमन ह धर लीस। थोकन देर तक आशीष ल रोके के बाद एक आन संगी दीपांशु तको पहुंच गे अऊ ओ मन आशीष ल पार म ले आइन। पानी के तेज बहाव म बोहए के सेती आशीष बेहोश हो गए रहिस। पार म लाके उमन आशीष के पेट म भरे पानी ल बाहिर निकालिन। अमन के सूझबूझ अऊ साहस ले ओखर संगी आशीष के जान बच गए। पानी के तेज बहाव अऊ चट्टान म टकराए के सेती अमन के हाथ के हड्डी खिसक गए रहिस। हाथ, पैर, गला अऊ छाती म गहरी चोट घलोक लगे रहिस। सबो संगी आशीष अऊ अमन ल लेके जिला चिकित्सालय म पहुंचिन। उहां उपचार के बाद जब सबो सुरक्षित घर लहुटिन त सबो ह अमन के साहसिक काम ल सहराइन।