छत्तीसगढ़ के अमनज्योति ल मिलही राष्ट्रीय बाल वीरता पुरस्कार

24 फ़रवरी 2022 रइपुर। छत्तीसगढ़ के अमनज्योति जाहिरे ल राष्ट्रीय बाल वीरता पुरस्कार बछर 2021 देहे जाही। भारतीय बाल कल्याण परिषद नई दिल्ली ह कोरबा जिला निवासी अमन ज्योति के चयन ये पुरस्कार बर करे हे। मुख्यमंत्री दाउ भूपेश बघेल अउ महिला एवं बाल विकास मंत्री श्रीमती अनिला भेंड़िया ह साहसी अमनज्योति के चयन राष्ट्रीय पुरस्कार बर होए म ओला बधई अउ शुभकामनाएं दीन हें। साहसिक कार्य अउ बहादुरी खातिर लइका मन ल नगद राशि सहित प्रमाण पत्र के संग भारतीय बाल कल्याण परिषद कोति ले हरेक बछर ये पुरस्कार देहे जाथे। कोविड के सेति पुरस्कार देहे के तिथि के घोषणा पाछू करे जाही।
मिल चुके हे राज्य बाल वीरता पुरस्कार
अमनज्योति ल ओकर साहसिक कार्य बर छत्तीसगढ़ राज्य बाल कल्याण परिषद कोति ले राज्य वीरता पुरस्कार तको सम्मानित करे गे रिहिसे। राज्यपाल सुश्री अनसुईया उईके ह गणतंत्र दिवस के बेरा म रायपुर म आयोजित मुख्य समारोह अउ राजभवन म बहादुर लइका मन ल सम्मानित करे गे रिहिसे।
जान पर खेल बचाए रिहिसे युवक के जान
कोरबा रहइया 15 वर्षीय अमन ज्योति ह अपन बड़े एक झिन छात्र के जान बचाए रिहिसे। एक अगस्त 2021 फ्रेंडशिप डे के दिन कुछ छात्र कोरबा शहर ले लगभग 20 किलोमीटर दूर पिकनिक स्पॉट परसखोला बांध गे रिहिसे। झरना म हाथ-पैर धोवत एक झिन छात्र आशीष ठाकुर के पैर फिसल गे। वोह पानी म बोहाए लगिस। जेला अमनज्योति ह अपन जान के बाजी लगाके बचाए रिहिसे। अमन के सूझ-बूझ अउ साहस ले ओकर संगवारी आशीष के जान बचगे रिहिस हे।