- मुख्यमंत्री ह सोनाखान ल पर्यटन केन्द्र के रूप म विकसित करे के घोषणा करिन
- सोनाखान म अमर शहीद वीर नारायण सिंह के स्मारक ल नवा भव्यता दीए जाही
रायपुर, अमर शहीद वीर नारायण सिंह के जन्मस्थली सोनाखान ल पर्यटन केन्द्र के रूप म विकसित करे जाही। मुख्यमंत्री श्री भूपेश बघेल ह आज अमर शहीद वीर नारायण सिंह के शहादत दिवस म ओ मन ल सोनाखान पहुंचके विनम्र श्रद्धांजलि दीन। ये मौका म उमन सोनाखान ल पर्यटन केंद्र के रूप म विकसित करे के घोषणा करिन अऊ उहां बनाए गए स्मारक ल नवा भव्यता देके उहां कई ठन सुविधा विकसित करे के बात कहिन। कार्यक्रम म नगरीय प्रशासन मंत्री डॉ. शिवकुमार डहरिया, विधायक श्री मोहन मरकाम, कसडोल विधायक सुश्री शकुंतला साहू संग बहुत अकन जनप्रतिनिधि अऊ अमर शहीद वीर नारायण सिंह के परिवारजन उपस्थित रहिन।
मुख्यमंत्री श्री बघेल ह बालौदाबाजार-भाटापारा जिला के कसडोल विकासखण्ड के ग्राम सोनाखान म अमर शहीद वीर नारायण सिंह के शहादत अउ श्रद्धांजलि दिवस म आयोजित कार्यक्रम ल सम्बोधित करत कहिन कि भारतीय स्वतंत्रता आंदोलन के गौरवशाली इतिहास म छत्तीसगढ़ के वीर सपूत शहीद वीर नारायण सिंह के बलिदान ल हमेशा याद करे जाही। उमन कहिन कि छत्तीसगढ़ महतारी के सच्चा सपूत वीर नारायण सिंह जेमन सन् 1857 म देश के पहिली स्वतंत्रता संग्राम आंदोलन म जनता म देशभक्ति के संचार करिन। सन् 1856 के भयानक अकाल के समय गरीब मन ल भूख ले बचाय बर अंगरेजी हुकूमत के खिलाफ कड़ा संघर्ष करिस अऊ जनता के भलाई बर अपन प्राण तक न्यौछावर कर दीन। देश के आजादी अऊ मातृभूमि के प्रति सेवा, समर्पण अऊ ऊंखर बलिदान ल हमेशा याद करे जाही।
सोनाखान म आयोजित कार्यक्रम म मुख्यमंत्री श्री बघेल ह शहीद वीर नारायण के सातवीं पीढ़ी के श्री रजिंदर सिंह दीवान संग आन परिजन मन ल सम्मानित करिन। ये बेरा म स्कूली लइका मन ह शहीद वीर नारायण सिंह के व्यक्तित्व अऊ कृतित्व उपर आधारित बहुत अकन देशभक्तिपूर्ण सांस्कृतिक कार्यक्रम के प्रस्तुति दीन।
