मुख्यमंत्री ह शहादत दिवस म शहीद वीर नारायण सिंह ल दीन विनम्र श्रद्धांजलि
रायपुर, मुख्यमंत्री श्री भूपेश बघेल ह काल 10 दिसम्बर के छत्तीसगढ़ के पहिली स्वतंत्रता सेनानी अमर शहीद वीरनारायण सिंह के शहादत दिवस म ओ मन ल नमन करत विनम्र श्रद्धांजलि दिए हें। मुख्यमंत्री श्री बघेल ह कहे हें कि भारतीय स्वतंत्रता आंदोलन के गौरवशाली इतिहास म छत्तीसगढ़ के वीर सपूत शहीद वीर नारायण सिंह के बलिदान ल हमेशा याद करे जाही।
श्री बघेल ह कहिन कि छत्तीसगढ़ महतारी के सच्चा सपूत वीर नारायण सिंह जेमन सन् 1857 म देश के पहिली स्वतंत्रता संग्राम आंदोलन म छत्तीसगढ़ के जनता म देश भक्ति के संचार करिन। सन् 1856 के भयानक अकाल के बेरा म गरीब मन ल भूख ले बचाय बर उमन अंगरेजी हुकुमत के खिलाफ कठिन संघर्ष करिन अऊ अपन प्राण न्यौछावर कर दीन। शहीद वीर नारायण सिंह के देश के आजादी अऊ मातृभूमि के प्रति समर्पण, बलिदान ल हमेशा याद करे जाही।
