खाद्य मंत्री ह महिला हेल्प डेस्क अऊ बाल मित्र थाना के करिन उद्घाटन

रायपुर, 10 फरवरी 2021। खाद्य अऊ संस्कृति मंत्री श्री अमरजीत भगत ह बुधवार के सीतापुर पुलिस थाना के नवा बने महिला हेल्प डेस्क अऊ बाल मित्र थाना के उद्घाटन करिन। ये बेरा म उमन शहीद के परिजन मन ल शाल अऊ श्रीफल देके सम्मानित करिन। ये मौका म मंत्री श्री भगत ह कहिन कि पुलिस के जवान बरसात, ठंड, गर्मी आदि विषम परिस्थिति मन म घलोक अपन दायित्व के बखूबी निर्वहन करे म हमेशा तत्पर रहिथें।
मंत्री श्री भगत ह सीतापुर म विधिवत पूजा-अर्चना करके मक्का खरीदी केन्द्र के तको शुभारंभ करिन। ये बेरा म उमन कहिन कि क्षेत्रवासी मन के मांग म मक्का खरीदी केंद्र के मांग ल पूरा करे गए हे। मक्का खरीदी केन्द्र शुरू हो जाय ले क्षेत्र के मक्का उत्पादक किसान मन ल समर्थन मूल्य म मक्का बेचे म सहुलियत होही। मंत्री श्री भगत सीतापुर के स्टेडियम म आयोजित विकासखण्ड स्तरीय सुआ, करमा अऊ शैला प्रतियोगिता कार्यक्रम म घलोक सामिल होइन। उमन 187 हितग्राही मन ल स्वेच्छानुदान के चेक अऊ करमा, शैला नृत्य के 50 दल ल 10-10 हजार रूपिया प्रदान करिन। ये बेरा म स्थानीय जनप्रतिनिधि अऊ ग्रामीणजन उपस्थित रहिन।