अलगेच होही छत्तीसगढ़ के नवा फिलिम पॉलिसी: श्री अमरजीत भगत

रायपुर, 11 जून 2021। संस्कृति मंत्री श्री अमरजीत सिंह भगत ह कहे हें कि मुख्यमंत्री श्री भूपेश बघेल के निर्देशन म छत्तीसगढ़ म नवा फिल्म पॉलिसी के मसौदा तियार करे जात हे। प्रदेश के नवा फिल्म पॉलिसी देश म यूनिक होही। नवा फिल्म पॉलिसी के मसौदा कई राज्य मन के फिल्म नीति मन के अध्ययन करके तियार करे जाही। एखर से प्रदेश के फिल्म निर्माता-निर्देशक, कलाकार, तकनिशियन संग फिल्म जगत ले जुड़े सबो मनखे मन ल राष्ट्रीय अऊ अंतर्राष्ट्रीय स्तर म एकर लाभ मिलही। श्री भगत ह कहिन कि छत्तीसगढ़ी फिल्म मन के माध्यम ले इहां के कला-संस्कृति अऊ परंपरा ल संजोए के काम होही, उहें प्रदेश के कलाकार मन ल एक बड़का मंच अऊ अवसर मिल सकही। संस्कृति मंत्री श्री अमरजीत भगत कोति ले काली प्रदेश के छत्तीसगढ़ी फिल्म निर्माता-निर्देशक अऊ कलाकार मन के संग छत्तीसगढ़ म नवा फिल्म पॉलिसी तियार करे बर वर्चुअल माध्यम ले मंथन करे गीस। ये मौका म निर्माता-निर्देशक अऊ कलाकार मन ह अपन-अपन सुझाव दीन। जानबा हे कि लम्बा समय ले निर्माता-निर्देशक अऊ कलाकार मन कोति ले फिल्म पॉलिसी तियार करे के मांग करे जात रहिस। मुख्यमंत्री श्री भूपेश बघेल ह प्रदेश के कलाकार मन के हित ल ध्यान म रखत उंखर मांग ल गंभीरता ले लेहे अऊ अब जल्दीच नवा फिल्म पॉलिसी तियार हो जाही।