संस्कृति मंत्री श्री अमरजीत भगत ह प्रदर्शनी के करिन उद्घाटन

रायपुर, पूर्व प्रधानमंत्री स्व. श्रीमती इंदिरा गांधी के पुण्यतिथि अऊ लौह पुरूष सरदार श्री वल्लभ भाई पटेल के जयंती म जनसंपर्क विभाग कोति ले साइंस कॉलेज ऑडिटोरियम म आयोजित एक दिवसीय छायाचित्र प्रदर्शनी के आज संस्कृति मंत्री श्री अमरजीत भगत ह उद्घाटन करिन। श्री भगत ह पूर्व प्रधानमंत्री स्व. श्रीमती इंदिरा गांधी अऊ लौह पुरूष सरदार स्व. श्री वल्लभ भाई पटेल के फोटू म फुल चढ़ा के प्रदर्शनी के शुरूआत करिन अऊ खुद प्रदर्शनी के अवलोकन करिन। उमन ये प्रदर्शनी ल एक महत्वपूर्ण पहल बतात कहिन कि आयरन लेडी ऑफ इंडिया, देश के पूर्व प्रधानमंत्री श्रीमती इंदिरा गांधी अऊ देश के लौह पुरुष सरदार श्री वल्लभ भाई पटेल के व्यक्तित्व, कृतित्व, अऊ जीवन ले जुड़े कई ठन उपलब्धि मन ल समझे बर ये प्रदर्शनी अड़बड़ महत्वपूर्ण हे।
ये बेरा म मदरसा बोर्ड के उपाध्यक्ष श्री इरफान सिद्दीकी, जनसंपर्क आयुक्त श्री दीपांशु काबरा, जनसंपर्क संचालक श्री सौमिल रंजन चौबे समेत जनसम्पर्क विभाग के समस्त अधिकारी, कर्मचारी उपस्थित रहिन।