गोठान म बने चाक ले उबकही तखता म ज्ञान के सफेद आखर

अम्बिकापुर, जिला के स्व सहायता समूह के महिला मन ह अपन हुनर के छाप छोड़त लइका मन के भविष्य गढ़े म घलोक सहभागिता निभाना शुरू करे हें। लखनपुर विकासखण्ड के पुहपुटरा गोठान म समूह के महिला मन ह चाक निर्माण के काम शुरू करे हें जेन ल स्कूल मन म भेजे जाही। इहां बने चाक ले स्कूल के तकता मन म ज्ञान के सफेद आखर उबकही।
कलेक्टर श्री संजीव कुमार झा के बताए रद्दा अउ जिला पंचायत सी.ई.ओ. श्री विनय कुमार लंगेह के सियानी म पुहपुटरा गोठान के 10 सदस्य ज्योति गुलाब स्व सहायता समूह के महिला मन ह चाक के निर्माण शुरू करे हें। अब तक करीब 30 नग के 200 पैकेट चाक तियार हो गए हे। इहां बने चाक ल प्रति पैकेट 30 रूपिया के दर म स्कूल अउ बाजार म बेंचे जाही। समूह के महिला मन ह बताइन कि चाक बनाए बर एनआरएलएम के टीम ह ओ मन ल प्रशिक्षण देहे हे। चाक बनाए बर प्लास्टर ऑफ पेरिस संग आन जरूरी सामान के जरूरत होथे। मिश्रित सामान ल सांचा म डालके चाक तियार करथें। उमन बताइन कि रोजेच करीब 3000 नग चाक के निर्माण करथें।
जानबा हे कि जिला के गोठान मन ल मल्टीएक्टिविटी सेंटर के रूप म विकसित करे बर रीपा के तहत कई औद्योगिक इकाई स्थापित करे जात हे। गोठान मन म नियमित रूप ले आजीविका गतिविधि सरलग संचालित होही जेखर से समूह के महिला मन के आर्थिक स्थिति मजबूत होही।