छत्तीसगढ़ म जन्म अउ मृत्यु प्रमाण पत्र के प्रक्रिया अब पूरा ऑनलाइन हो गे

रायपुर, छत्तीसगढ़ राज्य म जन्म अउ मृत्यु प्रमाण पत्र बनवाए के काम ल सरल, पारदर्शी अउ सुगम बनावत एला अब पूरा तरीका ले ऑनलाइन कर देहे गे हे। अब राज्य म जन्म अउ मृत्यु प्रमाण पत्र अनिवार्य रूप ले ऑनलाइन पोर्टल के माध्यम ले ही जारी करे जावत हे। भारत सरकार के महापंजीयक कार्यालय, नई दिल्ली डहर ले साल 2023 म संशोधित ऑनलाइन पोर्टल के सफल क्रियान्वयन ले ए व्यवस्था लागू होए हे।
संशोधित जन्म-मृत्यु पंजीकरण अधिनियम, 1969 के हिसाब ले अक्टूबर 2023 के बाद जन्म लेवइया सबो लइका मन बर जन्म तारीख के सबूत (प्रमाण) के रूप म सिर्फ ‘जन्म प्रमाण पत्र’ ही एक ठीन मान्य दस्तावेज (कागज) होही। एकर ले पहिचान से जुड़े प्रक्रिया म स्पष्टता अउ एकरूपता आए हे। अक्टूबर 2023 ले पहिली जन्मे लइका मन के मामला म पहिली असन दूसर वैकल्पिक दस्तावेज घलो मान्य रहिही। संग म, पहिली जारी करे गे ऑफलाइन प्रमाण पत्र मन ल घलो अब पोर्टल के माध्यम ले डिजिटल रूप म सुरक्षित राखे जा सकत हे।
राज्य म अक्टूबर 2023 के बाद ले सबो जन्म प्रमाण पत्र ऑनलाइन जारी करे जावत हे। शुरू म आए तकनीकी दिक्कत मन ल समय रहत सुधार लेहे गे हे, जेकर से अभी पोर्टल बढ़िया अउ तकनीकी रूप ले सक्षम हो गे हे। भारत सरकार के महापंजीयक कार्यालय कोति ले समय-समय म जरूरी तकनीकी सहयोग अउ मार्गदर्शन घलो मिलत हे।

रजिस्ट्रार मन ल मिलिस प्रशिक्षण
ए व्यवस्था ल अउ मजबूत बनाए बर राज्य के सबो रजिस्ट्रार (जन्म-मृत्यु) ल पोर्टल चलाए के जरूरी प्रशिक्षण (ट्रेनिंग) देहे गे हे। जरूरत के हिसाब ले जिला स्तर म घलो सरलग प्रशिक्षण कार्यक्रम रखे जावत हे, ताकि आम जनता ल प्रमाण पत्र जारी करे के प्रक्रिया म कोनो किसम के परेशानी झन होवय।
राज्य सरकार ह आधार कार्ड बनाए के प्रक्रिया म घलो एकरूपता लाए बर सबो संबंधित एजेंसी मन ल साफ-साफ हुकुम जारी कर के अनुरोध करे हे। एकर ले नागरिक मन ल समय म अउ सही दस्तावेज मिल सकही।
ए पहल राज्य म डिजिटल सेवा के विस्तार, प्रशासनिक काम म तेजी अउ नागरिक सुविधा के दिशा म एक ठीन बड़का कदम ए, जेकर ले आम जनता ल जल्दी, सुरक्षित अउ भरोसा लायक सेवा मिलत हे।