रायपुर GG Digital News Desk, जोहार छत्तीसगढ़ पार्टी के प्रमुख अमित बघेल ल कोर्ट ह 3 दिन बर पुलिस रिमांड म भेज देहे हे। अब उमन पुलिस के हिरासत म रहि के ही अपन दाई के अंतिम संस्कार म सामिल होहीं।
का हे पूरा मामला?
अमित बघेल उपर आरोप हे के उमन कुछ दिन पहिली अग्रवाल समाज के भगवान अग्रसेन महाराज अउ सिंधी समाज के भगवान झूलेलाल जी के बारे म भड़काऊ बयान दे रिहिन। एखर से समाज के लोगन म भारी गुस्सा रिहिस अउ रायपुर, रायगढ़ समेत कई जगा उंखर खिलाफ एफआईआर (FIR) दर्ज कराए गे रिहिस।
कोर्ट म का होइस?
थाना म सरेंडर करे के बाद पुलिस ह अमित बघेल ल न्यायिक मजिस्ट्रेट जेनिफर लकड़ा के कोर्ट म पेस करिस। कोर्ट ह पुलिस ल 3 दिन तक पूछताछ करे के अनुमति देहे हे। अब अमित ल 8 दिसंबर के फेर कोर्ट म पेस करे जाही।
दुख के घड़ी
अमित बघेल के दाई के निधन हो गे हे, तेखर सेती कोर्ट के फैसला के बाद पुलिस ह ओला उंखर गाँव ले गीस, ताकि वो पुलिस कस्टडी म रहि के ही अपन दाई के क्रिया-करम कर सकय।