- नगरीय निकाय के हर एक वार्ड अऊ हर एक ग्राम पंचायत के एक-एक स्कूली शौचालय आदर्श शौचालय के रूप म होही विकसित
- मध्यान्ह भोजन बर जरूरी सबो चीज मन के आपूर्ति ग्रामीण आजीविका केन्द्र मन के माध्यम ले होही
- मुख्य सचिव ह क्रियान्वयन के दीन हुकुम
रायपुर, राज्य के सबो नगरीय क्षेत्र मन के हर एक वार्ड अऊ हर एक ग्राम पंचायत मन के एक-एक स्कूल म आदर्श शौचालय के निर्माण करे जाही। ए शौचालय मन म कम लागत म अच्छा गुणवत्ता के निर्माण काम प्राथमिकता के आधार म करे जाही। शौचालय मन म रनिंग वाटर, ड्रेनेज व्यवस्था आदि के समुचित व्यवस्था करे जाही। संगेच एकर नियमित साफ-सफाई अऊ रख-रखाव बर विशेष प्रबंध करे जाही। मुख्य सचिव श्री अमिताभ जैन ह अवइया शिक्षा सत्र म टेबलेट के पहिली टॉयलेट अभियान ल मूर्त रूप देहे के हुकुम देहे हें। ए शौचालय मन के निर्माण कई विभाग मन ले संचालित कई योजना मन के समन्वय ले करे जाही। श्री जैन ह प्रधानमंत्री पोषण शक्ति निर्माण (मध्यान्ह भोजन) योजना के अंतर्गत प्रयुक्त होवइया खाए के सामान संग आन चीज मन के खरीदी गौठान म संचालित ग्रामीण आजीविका केन्द्र ले करे के हुकुम देहे हें। उमन मध्यान्ह भोजन बर स्थानीय स्तर म मिलइया सामान अऊ बाजार ले बिसाए लइक सामान के सूची बनाके ये कर उपर अमल करे ल कहे हें। मध्यान्ह भोजन म लगइया सबो चीज मन के आपूर्ति ग्रामीण आजीविका केन्द्र मन के माध्यम ले सुनिश्चित करे के निर्देश दे गे हे।
स्कूल शिक्षा विभाग के संपूर्ण शिक्षा कार्यकारिणी समिति अऊ प्रधानमंत्री पोषण शक्ति निर्माण (मध्यान्ह भोजन) योजना के क्रियान्वयन बर गठित राज्य स्तरीय मानिटरिंग सह संचालन समिति के बैठक आज मंत्रालय महानदी भवन म मुख्य सचिव श्री अमिताभ जैन के अध्यक्षता म होइस। बैठक म शिक्षण सत्र 2022-23 बर संपूर्ण शिक्षा के तहत 3456.98 करोड़ रूपिया के वार्षिक कार्ययोजना अऊ मध्यान्ह भोजन योजना बर कुल 696.18 करोड़ रूपिया के वार्षिक कार्ययोजना के अनुमोदन करे गीस। अनुमोदन के बाद ये प्रस्ताव भारत सरकार ल स्वीकृति बर भेजे जाही। बैठक म प्रमुख सचिव स्कूल शिक्षा डॉ. आलोक शुक्ला, सचिव स्कूल शिक्षा डॉ. कमलप्रीत सिंह, सचिव लोक स्वास्थ्य यांत्रिकी श्री धनंजय देवांगन, संचालक लोक शिक्षण श्री सुनील जैन संग वरिष्ठ विभागीय अधिकारी उपस्थित रहिन।
