बिहान योजना ले मिलीस नवा उड़ान: ग्राम सारागांव के उत्तरा ध्रुव बनिस महिला सशक्तिकरण के मिसाल

स्व-रोजगार ले आत्मनिर्भरता कोति बढ़त कदम
गरियाबंद, श्रीमती उतरा ध्रुव ह अपन लगन अऊ मेहनत के बल म अपन आगू बढ़े बर रद्दा खोज लेहे हे। वोखर उत्साह अऊ मेहनत ले ओला एक नवा मुकाम हासिल होए हे। वो अपन लगन ले अलग-अलग काम करत-करत अकतहा आमदनी के स्त्रोत बना लेहे हे अऊ आत्मनिर्भर होके स्वावलंबी जीवन बितावत हे। ग्राम चौक स्थित अपन दुकान म वो ह कंप्यूटर अउ प्रिंटर के सुविधा घलोक शुरू करे हे, जेखर से गांव वाले मन ल कागद मन के प्रिंटिंग सेवा मिलत हे अऊ ओ ल अकतहा आमदनी होवत हे। उतरा अब अपन परिवार के मनखे मन उपर आश्रित नइ रहके अपन पांव म खड़े हो गए हे।
गरियाबंद जिला के छुरा विकासखंड के ग्राम सारागांव के श्रीमती उत्तरा ध्रुव ह राष्ट्रीय ग्रामीण आजीविका मिशन (बिहान) ले जुड़के न सिरिफ अपन जिंदगी के दिशा बदले हे, बल्कि अब ओ क्षेत्र के सैकड़ों महिला मन बर प्रेरणास्त्रोत बन गए हे। महिमा महिला स्व-सहायता समूह के सदस्य श्रीमती उत्तरा ह समूह ले 50 हजार रुपिया के करजा लेके अपन खेत म बोर खनन कराइस अऊ ढाई एकड़ जमीन म डबल फसल लेहे शुरू करिस। अभी हाल म ओ खरीफ सीजन म लगभग 70 हजार अऊ रबी सीजन म 50 हजार रुपिया के आय अर्जित करे हे।
खेती के संगे-संग वो ह अपन गांव म किराना दुकान घलोक चालू करे हे, जेखर से वोखर आमदनी म अऊ इज़ाफा होय हे। एखर अलावा, ओ ह रिसोर्स बुक कीपर के रूप म काम करत हे अऊ ओ ल समूह के पंजीयन, लेखा काम मन के निगरानी अउ ऑडिट जइसे जिम्मेदारी मन बर हर महिना पांच हजार रुपिया मानदेय तको मिलत हे।
पहिली साइकिल ले मैदानी स्तर म भ्रमण के काम करइया उत्तरा ह अब अपन मेहनत के कमाई ले स्कूटी बिसाए हे, जेखर से ओखर काम अऊ सहज हो गए हे। आज ओ पूरा आत्मनिर्भर हे अऊ ओखर परिवार घलोक प्रगति के राह म हे। वोखर एक बेटी नर्सिंग के पढ़ाई करत हे, दुसर बेटी सिलाई के काम सीखत हे, जबकि ओखर बेटा भजन मंडली म आधुनिक वाद्य यंत्र बजाके अपन मां के संग कार्यक्रम मन म भाग लेथे अऊ अकतहा आय अर्जित करथे।
श्रीमती उत्तरा ध्रुव के ये सफलता साबित करथे के जब महिला मन ल अवसर अऊ सहयोग मिलथे, त ओ मन आत्मनिर्भरता, नेतृत्व अऊ नवाचार के क्षेत्र म घलोक उत्कृष्ट उदाहरण प्रस्तुत कर सकत हे। बिहान योजना ह ओ मन ल केवल एक नवा रद्दा भर नइ देखाईस, बल्कि एक प्रेरणादायी पहिचान घलोक देहे हे।