कोण्डागांव, जीवन म हम छोटे-छोटे कठिनाइ मन के आगू हार मान के उदास हो जाथन, जीवन म ए कठिनाइ मन के आगू डटे रहना ही आप मन के हिम्मत अऊ साहस के परिचय बनथे। अइसनहे हिम्मत अऊ साहस के परिचय देवइया नारी सशक्तिकरण के एक उदाहरण देखे ल मिलही जनपद पंचायत फरसगांव ले तीन किलोमीटर दूरिहा म बसे ग्राम पंचायत गट्टीपलना म अनसिया मरकाम के रुप म। तीन साल पहिली बिक्कट दिन ले खराब स्वास्थ्य के चलते अचानक वोखर पति के देहांत हो गे। अइसन म अनसिया के उपर वोखर 01 साल 08 महिना के बेटा के लालन-पालन के पूरा जिम्मेदारी आ गे। वोखर पास कोनो पैतृक सम्पत्ति घलोक नइ रहिस। अइसन म ओ ह जेन बिहान समूह ले दू बछर ले जुड़े रहिस ओखर से लोन लेके एक किराना के दुकान अपनेच घर म खोले के निर्णय लीस। फेर उहां घलोक ओ ल असफलता ही मिलीस तभो ले वो ह हार नइ मानिस।
एखर बा वो ह बिहान योजना म रहि के समूह मन के पंजी संधारण के काम चालू करिस। ताकि अपन परिवार के लालन-पालन कर सकय। एखर संगेच वो ह ग्राम संगठन म लेखापाल के काम घलोक नवा दिशा महिला संगठन म करे लगिस। छै महिना पहिली 2021 म जिला प्रशासन कोति ले सबो विकासखण्ड मुख्यालय म समूह के बनाए उत्पाद मन के विक्रय बर स्थापित करे जात कोंडानार मार्ट फरसगांव म घलोक वो ह अंशकालीक रूप ले लेखापाल के रूप म काम करना चालू करिस।
महिला मेट बनके महिला मन ल बढ़ाईस आगू
अभी हाल म सरकार कोति ले मनरेगा योजना म महिला मन के आर्थिक स्थिति सुधार बर महिला मेट के चयन के संबंध म रोजगार सहायक सनत नेताम ले वोला जानकारी मिलिस। वोखर खुशी के ठिकाना नइ रहिस। वो ह गांवे म नवंबर महिना ले महिला मेट के रूप म काम करना चालू करिस। समूह म सक्रिय सदस्य होए के ओ ल लाभ मिलीस। जेखर से ओ ह गांव के जादा ले जादा महिला मन ल योजना ले जोड़ लीस। पास के गांव के बीसी सखी करूणा पाण्डे के घलोक वोला संग मिलीस। जेखर से मजदूर मन के दैनिक मजदूरी के भुगतान गांवे म ही करवाना चालु करिस। जेखर से मजदूर मन म मनरेगा काम मन के प्रति भरोसा बाढि़स। ग्राम के मजदूर घलोक काम बर प्रेरित होइन जेखर से गांव के निर्माण काम मन ल प्रगति मिलीस।
गांव के महिला मन ल घलोक एखर से प्रेरणा मिलीस अऊ जिहां कभू महिला मन के मनरेगा काम मन म सहभागिता बहुत कम होवत रहिस, उहें आज ये ह 61.86 प्रतिशत तक पहुंच गए हे। जेमां अनसिया के महत्वपूर्ण योगदान हे। ये संबंध म ग्राम के सरपंच अनिता मरकाम अउ सचिव माधुरी नेताम ह बताइस कि अनसिया अपन काम ल बहुतेच पसंद करथे संगेच मनरेगा योजना मोबाइल मॉनिटरिंग, जॉब कार्ड संधारण, डिमांड बनाना, सात पंजी संधारण अउ मजदूरी भुगतान करे के काम ले मनखे मन के बीच अपन काम के पारदर्शिता के सेती अपन अलग पहिचान लेहे हे। अनसिया सबे मनखे मन बर एक बेहतर उदाहरण हे जेन जीवन म मायूस हो जाथें, अनसिया मरकाम ह शासन के दू महत्वपूर्ण योजना बिहान अऊ मनरेगा म कड़क मेहनत के माध्यम ले काम करे अऊ समर्पण ले कठिनाई मन ल मात देके गांव के विकास म अपन योगदान ले सबो बर उदाहरण प्रस्तुत करे हे।
