गरियाबंद 15 सितम्बर 2020। कोविड-19 के कारण 14 मार्च ले आंगनबाड़ी केन्द्र मन के संचालन बंद रखे गए रहिस, आंगनबाड़ी कार्यकर्ता मन हितग्राही मन के घर पहुंच के सूखा रासन देवत रहिन। लइका मन के पोषण स्तर ल बनाये रखे अऊ स्वास्थ्य सुविधा बर अभी हाल व्यवस्था म कुपोषण के रोकथाम बर कारगर कदम उठाये के जरूरत ल ध्यान म रखत प्रदेस म आंगनबाड़ी केन्द्र मन म गरम भोजन अऊ स्वास्थ्य अऊ पोषण दिवस चालू करे बर मुख्यमंत्री श्री भूपेश बघेल ह हुकुम देहे रहिन।
जिला म संचालित 1460 आंगनबाड़ी केन्द्र मन म ले 698 आंगनबाड़ी केन्द्र मन म 03 ले 06 साल के 6371 लइका मन अऊ 607 गर्भवती महिला मन ल गरम भोजन बांटे गीस। गरम भोजन के सेवा चालू करे बर रणनीति तियार करके काम करे गीस, जेखर तहत सबो आंगनबाड़ी केन्द्र खोले गीस। केन्द्र चालू करे के पहिली भवन के सेनेटाईजेसन करे गीस। येकर बर पंचायत अऊ ग्रामीण विकास विभाग ले सहयोग प्राप्त करे गीस। हर एक हितग्राही के भवन म प्रवेस के पहिली साबुन ले सेनेटाईज कराए गीस। भोजन पकाए के पहिली बर्तन मन ल उपयुक्त क्लिनिंग पाउडर अऊ गरम पानी ले साफ करे गीस। भोजन परुसत बेरा थाली म यथासंभव उपलब्धता अनुसार पत्तल/केला पत्ता रखे गीस। हितग्राही मन ल अलग अलग समूह मन म अलग अलग समय म बलाए गीस ताकि सामाजिक दूरी बनाये रखे जा सकय। एक समय म 15 मनखे ले जादा मनखे मन ल भवन म प्रवेस नइ दे गीस। गरम भोजन बर पात्र हितग्राही 3-6 साल के लइका, गर्भवती महिला अऊ सुपोषण अभियान के हितग्राही ल ही आए के अनुमति देहे गीस। आंगनबाड़ी केन्द्र म प्रवेस करइया सबो हितग्राही मन ल मास्क पहिरना अनिवार्य करे गीस। संगेच हर एक हितग्राही के बीच कम से कम 02 गज के दूरी रखे गीस। आंगनबाड़ी केन्द्र चालू करे के पहिली लइका मन के अभिभावक मन के संग बैठक लेके उंखर से सहमति प्राप्त करे गीस।
