– लइका मन ल केंद्र म भेजना अभिभावक मन के स्वेच्छा म, जऊन आंगनबाड़ी केंद्र नइ आहीं अइसन लइका मन के घर भेजे जाही रेडी-टू-ईट फूड
दुर्ग, 15 सितम्बर 2020। जिला म आंगनबाड़ी केंद्र मन म आज ले 3 ले 6 साल के लइका अऊ गर्भवती माता मन बर गरम भोजन देहे के शुरूआत हो गीस। ये व्यवस्था अइसे लइका मन बर करे गए हे जिंकर अभिभावक ओ मन ल स्वेच्छा ले आंगनबाड़ी भेजत हें। जऊन अभिभावक अपन लइका मन ल आंगनबाड़ी भेजे के उत्सुक नइ हें। ओ मन ल पहिली के जइसेच रेडी-टू-ईट फूड के वितरण करे जाही। जानबा हे के सुपोषण अभियान के लक्ष्य मन ल पाए बर शासन कोति ले ये संबंध म निर्देश जारी करे गए हे। ये संबंध म कलेक्टर डॉ. सर्वेश्वर नरेंद्र भुरे ह जिला के सबो आंगनबाड़ी मन म परखर व्यवस्था करे के निर्देश जिला कार्यक्रम अधिकारी ल देहे रहिन। ये संबंध म जानकारी देवत जिला कार्यक्रम अधिकारी श्री विपिन जैन ह बताइस के आज ले आंगनबाड़ी केंद्र मन म गरम भोजन बनाए के काम सुरू कर देहे गए हे। लइका मन ल आंगनबाड़ी केंद्र भेजे या नहीं, ये निर्णय पूरा अभिभावक मन के स्वेच्छा म रखे गए हे। श्री जैन ह बताइस के व्यवस्था के मानिटरिंग बर आज सबो परियोजना अधिकारी मन ल कई ठन केंद्र मन के निरीक्षण के निर्देश देहे गए रहिस। उमन बताइन के ओ मन दुर्ग ग्रामीण परियोजना के आंगनबाड़ी केंद्र तिरगा पहुंचिन। इहां उमन पूरा व्यवस्था के निरीक्षण करिन। पहिली घलव आंगनबाड़ी ल सैनिटाइज करे गए रहिस। आज घलोक इहां साफ सफाई करे गीस। लइका मन के हाथ साबुन म धोवाए गीस। फेर गरम भोजन कराए गीस। श्री जैन ह बताइस के सोशल डिस्टेंसिंग के पूरा ध्यान रखे गीस। जइसे तिरगा केंद्र म 28 लइका हें त तीन बैच बनाए गीस अऊ आधा घंटा के गेप दे गीस। आधा घंटा के अंतर म लइका मन ह खाना खाइन। एक बैच खा डरिन त दूसर बैच ल बइठारे गीस। एखर से सोशल डिस्टेंसिंग ल मेंटेन करे म सहयोग मिलीस। अइसनहे सबो केंद्र मन म करे गीस। संझा तक सबो केंद्र मन ले जानकारी लेहे गीस। सबो जगा म आंगनबाड़ी कार्यकर्ता मन ह लइका मन अऊ गर्भवती माता मन ल उत्साह ले भोजन कराइन। संगेच सोशल डिस्टेंसिंग अऊ सैनिटाइजेशन के घलोक पूरा ध्यान रखिन। सबो जगा म सुपरवाइजर अऊ परियोजना अधिकारी मन ह एखर मानिटरिंग घलोक करिन।