आंगनबाड़ी सेवा ले कुपोषित शिवांश होइस स्वस्थ

समन्वित उदीम अऊ संतुलित आहार ले मिलीस कुपोषण उपर जीत
मनेंद्रगढ़ चिरमिरी भरतपुर, मुख्यमंत्री श्री विष्णुदेव साय के अगुवई म कुपोषण मुक्‍त छत्तीसगढ़ के दिशा म चलत उदीम मन के प्रभाव अब जमीनी स्तर म दिखत हे। मनेंद्रगढ़ चिरमिरी भरतपुर जिला के चौनपुर गांव के आंगनबाड़ी केन्द्र नवापारा ले जुड़े बालक शिवांश ह आंगनबाड़ी सेवा अऊ परिवार के संघरा उदीम ले कुपोषण उपर विजय पाए हे।
शिवांश के जनम 12 जुलाई 2024 के होय रहिस। जनम के समय ओखर वजन 2.700 किलोग्राम रहिस। जनम के बाद  पोषण के उचित देखभाल नइ होए ले ओखर वजन घटके कुपोषण के श्रेणी म पहुँच गए रहिस। आंगनबाड़ी कार्यकर्ता अऊ मितानिन ह सरलग वजन मापन के समय स्थिति के पहिचान करिस अऊ तुरंते गृहभेंट करके परिवार ल उचित परामर्श दीस। श्रीमती लालसा कुमारी ल समझाए गीस के ओ अपन भोजन म अंकुरित अनाज, मौसमी फल, मुनगा भाजी, दूध, हरी सब्जि अऊ प्रोटीनयुक्त भोजन सामिल करय। लइका ल स्तनपान के संगे-संग ऊपरी आहार जइसे दलिया, खिचड़ी, गाढ़ दार, पंजीरी, लपशी अऊ हलुआ रोजेच 4-5 पइत हल्का रूप म देहे के सलाह देहे गीस। आंगनबाड़ी केन्द्र ले मिलइया रेडी टू ईट आहार के नियमित सेवन कराए गीस। संगेच परिवार ल स्वच्छता, टीकाकरण अऊ समय म वजन मापन खातिर प्रेरित करे गीस।
शिशु अवस्था के समय तेज़ी ले विकास अऊ बढ़ोतरी खातिर उचित पोषण बहुत महत्वपूर्ण हे। शुरुआती छै महीना तक केवल स्तनपान कराए के बाद, स्तनपान बंद करइया ला पूरक आहार देना ज़रूरी हे। ये आहार पोषक तत्व ले भरपूर होना चाही, जेमें रमजे फल, सब्ज़ि अऊ अनाज सामिल होवय, ताकि शिशु ल भरपूर विटामिन अऊ खनिज मिल सकय। सरलग देखरेख अऊ पौष्टिक आहार के सेवन ले शिवांश के वजन धीरे-धीरे बाढ़े लगिस। कुछेक महीना म ओखर वजन सामान्य श्रेणी म पहुँच गे। अब वो स्वस्थ अऊ सक्रिय हे।
ये सफलता ए बात के उदाहरण हे के आंगनबाड़ी के सेवा, मितानिन अऊ परिवार के संघरा उदीम करे ले कुपोषण जइसे चुनौती म सफलतापूर्वक नियंत्रण पाए जा सकत हे। महिला अऊ बाल विकास मंत्री श्रीमती लक्ष्मी राजवाड़े ह कहिन के शिवांश जइसे प्रेरक कहानी मन बताथे के जागरूकता, सामुदायिक सहयोग अऊ पोषण आहार के सरलग उपयोग ले “सुपोषित छत्तीसगढ़” के सपना साकार होवत हे।