मुख्यमंत्री सुपोषण अभियान के 3.34 लाख हितग्राही मन ल सूखा राशन अऊ 2.43 लाख हितग्राही मन ल पूरक पोषण आहार बांटे गीस

आंगनबाडी कार्यकर्ता घर-घर जाके रखत हें पोषण के ध्यान

रायपुर, 08 अपरेल 2020। मुख्यमंत्री श्री भूपेश बघेल ह लॉकडाउन के बेरा म महिला अऊ लइका मन के स्वास्थ्य अऊ पोषण स्तर ल ध्यान म रखत ऊंखर घर तक पोषण आहार पहुंचाए के व्यवस्था करे हें। एखर बर महिला अउ बाल विकास विभाग के आंगनबाड़ी कार्यकर्ता मन घरो-घर जा के हितग्राही मन तक सूखा राशन अऊ पूरक पोषण आहार (रेडी टू ईट) बांटत हें। मुख्यमंत्री सुपोषण अभियान के तहत गरम जेवन के वैकल्पिक व्यवस्था के तहत प्रदेश के 3.34 लाख चिन्हांकित हितग्राही मन ल लॉकडाउन के बेरा म सूखा राशन अऊ 2.43 लाख हितग्राही मन ल पूरक पोषण आहार बांटे गए हे। एमां 2.22 लाख गर्भवती, 2.36 लाख शिशुवती महिला अऊ 15 हजार किशोरी बालिका मन घलोक सामिल हें।

कोरोना वायरस संक्रमण ले बचाव बर पूरा देश म 25 मार्च ले लागू 21 दिन के लॉकडाउन के सेती प्रदेश म आंगनबाड़ी मन के बंद हो जाय ले पूरक पोषण आहार अऊ मुख्यमंत्री सुपोषण अभियान के अंतर्गत गरम जेवन के व्यवस्था बंद करना परे रहिस। एकर असर हितग्राही मन के स्वास्थ्य अऊ पोषण स्तर म झन होवय एखर खातिर रेडी टू ईट अऊ सूखा राशन वितरण के व्यवस्था करे गए हे। मुख्यमंत्री सुपोषण अभियान के चिन्हांकित हितग्राही मन ल रोजेच 100 ग्राम चावल, 25 ग्राम दाल अउ आन चना, गुड़, मूंगफली, अण्डा, सोयाबड़ी जइसे पौष्टिक जिनिस के मान ले 21 दिन बर सूखा राशन घर-घर पहुंचाए गए हे। अइसनहे 03 ले 06 साल आयु के समान्य, मध्यम अऊ गंभीर कुपोषित लइका मन ल गरम भोजन के जगा म वैकल्पिक व्यवस्था के रूप म 125 ग्राम रेडी टू ईट रोजेच के मान ले 750 ग्राम टेक होम राशन (रेडी टू ईट) वितरण हितग्राही मन ल करे गए हे। ये दौरान आंगनबाड़ी कार्यकर्ता मन ह मनखे मन ल कोरोना वायरस (कोविड-19) के फैलाव के रोकथाम बर निरधारित सुरक्षा मापदण्ड जइसे स्वच्छता, सामाजिक दूरी के घलोक समझाइश देहे जात हे।