रायपुर, 16 सितंबर 2020। प्रदेश म बीते एक सितंबर ले पोषण महिना मनाए जात हे। 30 सितंबर तक चलइया ये पोषण महिना के समय महिला अऊ बाल विकास विभाग कोति ले जन सामान्य बर कई प्रकार के जन-जागरूकता कार्यक्रम मन के आयोजन करे जात हे। आंगनबाड़ी कार्यकर्ता मन घर-घर जाके किशोरी बालिका, गर्भवती महिला मन ल उचित खान-पान के महत्व समझावत हें। ये दौरान पौष्टिक पदार्थ मन ले रंगोली, वाद-विवाद, निबंध लेखन जइसे कई ऑनलाइन प्रतियोगिता मन के आयोजन घलोक जिला स्तर म करे जात हे।
पोषण महिना के समय प्रदेश के दूरस्त अऊ वनांचल क्षेत्र मन म कुपोषण के अधिकता ल देखत प्रमुखता ले गर्भवती अऊ शिशुवती महिला अऊ ऊंखर परिवार ल छोटे लइका मन के समुचित देखभाल अऊ लइका के संग मां के पोषण अऊ स्वास्थ्यगत जरूरत मन के बारे म बताए जात हे। विभाग के मैदानी अमला ह लइका के शुरूआती 1000 दिन के महत्व बतात शिशुवती महिला मन ल स्तनपान कराए बर जागरूक करे जात हे। कार्यक्रम के मुख्य उद्देश्य लइका मन म अल्प पोषण, कम वजनी लइका मन के जन्म अऊ किशोरी बालिका, गर्भवती महिला, स्तनपान करइया माता अऊ लइका मन म रक्त के कमी ल दूर करना हे। ये दौरान लइका मन के ऊंचाई, किशोर लड़ड़ी मन अऊ गर्भवती माता मन के वजन के जांच घलोक करे जात हे अऊ कमजोर पाए गए किशोरी लड़की अऊ महिला मन ल स्वास्थ्य संबंधी जानकारी घलोक देहे जात हे। गर्भवती माता अऊ स्तनपान करइया महिला मन ल विशेष स्वास्थ्य सलाह घलोक देहे के काम करे जात हे। पोषण महिना के तहत स्वच्छता, स्वस्थ आदत, पोषण अऊ स्वच्छता प्रचार गतिविधि मन के महत्व के बारे म घलोक बताए जात हे।
