अनिल खेस्स ह सूंरा पोंस के कमाइस ग्यारा लाख रुपिया के मुनाफा, दू कुरया ल बढ़ा के बनाइस बड़का फारम

CHHATTISGARHI NEWS: अम्बिकापुर, सिरिफ दू कुरिया अउ सूंरा पालन के एक यूनिट ले शुरू होवइया स्वरोजगार के छोट कन उदीम आज एक सफल व्यवसाय बनगे हे। सरगुजा जिला के ग्राम शिवनाथपुर निवासी श्री अनिल कुमार खेस्स ह पशुधन विकास विभाग के सूकर प्रदाय योजना के सहयोग, विशेषज्ञ मन के मार्गदर्शन अउ अपन मेहनत के बल म ये मुकाम हासिल करे हे। आज ओखर फार्म म करिब 150 सूकर (सूंरा) हे। वित्तीय वर्ष 2024-25 म ओ ह लगभग 14.5 से 15 लाख रुपिया के बिक्री करिस, जेकर से वोला करिबन 11 लाख रुपिया के शुद्ध लाभ प्राप्त होईस।
अनिल के सफलता के खास बात ये हे के ओ ह व्यवसाय ले मिलइया आमदनी ला लगातार फार्म के विस्तार म लगइस। दू कमरा ले शुरू होए ए सूकर पालन बर ओ ह समय के संग 10 उपरहा कमरा तियार करिस अउ बेहतर प्रबंधन ले एला आय के मजबूत जरिया बनाइस।
वर्ष 2018 म पशुधन विकास विभाग के सूकर प्रदाय योजना के तहत ओला एक यूनिट मिले रहिस। शुरुआती साल म चुनौती आईस, फेर ओ ह व्यवसाय ला जारी रखिस अउ धीरे-धीरे बेहतर प्रबंधन म ध्यान दीस। सूकर पालन ले मिलइया आय के एक हिस्सा ला ओ ह दुबारा निवेश करिस, जेकर परिणाम ये आए के फार्म के लगातार विस्तार होवत गीस।
पशुधन विकास विभाग के चिकित्सक मन कोति ले ओला खान-पान, शेड प्रबंधन, प्रजनन, टीकाकरण अउ उपचार बर समय-समय म मार्गदर्शन मिलत रहिस। अनिल के ये कहानी बताथे के शासकीय योजना के सहयोग ला मेहनत अउ सही प्रबंधन से जोड़ के पशुपालन ला लाभकारी स्वरोजगार म बदले जा सकथे।