रायपुर, महिला एंव बाल विकास अऊ समाज कल्याण मंत्री श्रीमती अनिला भेंडिया ह डौण्डीलोहारा विकासखण्ड के ग्राम दुधली म इतवार के दिन आयोजित राशन कारड वितरण कार्यक्रम म महिला मन ल नवा राशन कारड बांट के अपन बधाई अऊ शुभकामना दीन। कार्यक्रम ल सम्बोधित करत मंत्री श्रीमती भेंडिया ह कहिन कि शासन कोति ले अवइया दू अकटूबर ले सार्वभौम पीडीएस लागू करे जात हे। उमन कहिन कि बीपीएल परिवार मन के संगेच अब एपीएल परिवार मन के घलोक राशन कार्ड बनाए जावत हे। प्रदेश के सबो परिवार ल शासकीय उचित मूल्य के दुकान मन ले चाउंर मिलही।
मंत्री श्रीमती भेंडिया ह राज्य शासन के जनकल्याणकारी योजना मन के बने परखर जानकारी देके ओखर लाभ उठाए बर गांव वाले मन ल प्रेरित करिन। उमन कहिन कि राज्य सरकार के किसान हितैषी निर्णय मन ले किसान मन ल बिक्कट राहत मिले हे। उमन शासन के महत्वकांक्षी नरवा, गरूवा, घुरवा अऊ बाड़ी योजना के महत्ता के जानकारी गांव वाले मन ल दीन अऊ कहिन कि एखर संरक्षण अऊ संवर्धन ले ग्रामीण अर्थव्यवस्था मजबूत होही। ये बेरा म ग्राम पंचायत दुधली के सरपंच श्री फिरोज तिगाला संग बड़ संख्या म ग्रामीण मौजूद रहिन।