रायपुर, महिला अऊ बाल विकास अऊ समाज कल्याण मंत्री श्रीमती अनिला भेंड़िया ह कहे हें कि समाज के आन क्षेत्र मन के जइसे खेलकूद के क्षेत्र म घलोक मनखे के आगू बढ़े अऊ उपलब्धि हासिल करे के असीम संभावना हे। उमन कहिन कि जुन्ना समय म ये उक्ति प्रचलित रहिस कि ‘पढ़ोगे लिखोगे तो बनोगे नवाब, खेलोगे कूदोगे तो होगे खराब‘ फेर आज हमर खेल प्रतिभा मन ह मेहनत अऊ लगन ले खेल के क्षेत्र म घलोक महत्वपूर्ण उपलब्धि हासिल करे हें। मंत्री श्रीमती भेंड़िया आज बालोद के सरदार वल्लभ भाई पटेल मैदान म आयोजित 22वां राज्य स्तरीय शालेय क्रीड़ा प्रतियोगिता के शुभारंभ अवसर म अपन उद्गार व्यक्त करत रहिन। जिला प्रशासन अऊ स्कूल शिक्षा विभाग कोति ले 11 सितमबर तक 22वां राज्य स्तरीय शालेय क्रीड़ा प्रतियोगिता के आयोजन करे गए हे।
मंत्री श्रीमती भेंडिया कार्यक्रम म मुख्य अतिथि के रूप म उपस्थित रहिन। कार्यक्रम के अध्यक्षता संजारी-बालोद विधायक श्रीमती संगीता सिन्हा ह करिन। कार्यक्रम म विशेष अतिथि के रूप म जिला पंचायत अध्यक्ष श्रीमती सोनादेवी देशलहरा, नगर पालिका परिषद बालोद के अध्यक्ष श्री विकास चोपड़ा, जिला पंचायत उपाध्यक्ष श्री मिथिलेश निरोटी, जनपद पंचायत बालोद के अध्यक्ष श्रीमती प्रेमलता साहू, कृषि उपज मण्डी बालोद के अध्यक्ष श्री भोलाराम देशमुख संग कलेक्टर डॉ. गौरव कुमार सिंह, पुलिस अधीक्षक श्री जितेन्द्र कुमार यादव उपस्थित रहिन।
कार्यक्रम म स्कूली लइका मन ह रंगारंग सांस्कृतिक कार्यक्रमों के प्रस्तुति दीन। सुमधुर छत्तीसगढ़ी गीत ‘हाय रे सरगुजा नाचे‘ के मधुर धुन म कार्यक्रम म उपस्थित अतिथि घलोक पढ़ईया लईका मन के संग नृत्य म संगत करे ले अपन आप मन ल रोक नइ पाइन। ये बेरा म मुख्य अतिथि ह खेल ध्वज फहराइन अऊ राष्ट्रीय खिलाड़ी कु. शतिकीय दुबे ह खिलाड़ी छात्र-छात्रा मन ल खेल भावना के संग प्रतियोगिता म सामिल होए के शपथ देवाइन।
