श्रीमती भेंड़िया ह करिन नवा सामुदायिक स्वास्थ्य केन्द्र भवन के भूमिपूजन

रायपुर, 11 मार्च 2020। महिला अउ बाल विकास अऊ समाज कल्याण मंत्री श्रीमती अनिला भेंड़िया ह 11 मार्च के बालोद जिला के डौण्डीलोहारा म दू करोड़ पचास लाख रूपिया के लागत ले बनइया नवा सामुदायिक स्वास्थ्य केन्द्र भवन के भूमिपूजन करिन। मुख्य अतिथि के आसंदी ले सम्बोधित करत मंत्री श्रीमती भेंड़िया ह कहिन के हरेक मनखे ल स्वास्थ्य सुविधा उपलब्‍ध कराना सरकार के प्राथमिकता हे। उमन कहिन कि नवा सामुदायिक स्वास्थ्य केन्द्र भवन बने ले क्षेत्र के जनता ल अऊ बेहतर स्वास्थ्य सुविधा के लाभ मिलही।
श्रीमती भेंड़िया ह कहिन कि स्वास्थ्य केन्द्र के रूप म क्षेत्र के जनता के स्वास्थ्य सुविधा संबंधी महत्वपूर्ण मांग पूरा हो गीस। अस्पताल शुरू हो जाय म क्षेत्र के आम जनता के समय अऊ धन के बचत होही। ये बेरा म नगर पंचायत डौण्डीलोहारा के अध्यक्ष श्रीमती लोकेश्वरी गोपी साहू, उपाध्यक्ष श्रीमती विद्या शर्मा, पार्षदगण, क्षेत्र के जनप्रतिनिधि, गणमान्य नागरिक, मुख्य चिकित्सा अउ स्वास्थ्य अधिकारी डॉ. बी.एल. रात्रे अउ आन अधिकारी, कर्मचारी संग बड़ संख्या म मनखे मौजूद रहिन।