अंकिता ल मिलीस अनुकम्पा नियुक्ति: परिवार ह मानिस राज्य सरकार के अभार

रइपुर 07 जून 2021 सम्मार। कोरोना संक्रमण ले होवइया मउत ल देखत छत्तीसगढ़ सरकार ह पाछू के अनुकम्पा नियुक्ति के प्रावधान मन म ढील करके अहम फैसला लेहे हे, जेकर सोझहे लाभ शासकीय सेवा म कमावत कर्मचारी मन के मउत के पीछू उन्कर परिजन मन ल तुरते अनुकम्पा नियुक्ति के रूप म मिलत हावय। धमतरी जिला म अनुकम्पा नियुक्ति म ढीलियई के फैसला के पीछू शासकीय कर्मचारी मन के मउत के नौ ठिन प्रकरण म उन्कर तीर के परिवारजन मन ल अनुकम्पा नियुक्ति देहे गे हवय।
धमतरी के मराठापारा वार्ड निवासी श्री सुनील कुमार गायकवाड़, जउन स्कूल शिक्षा विभाग म लिपिक रिहिन हे, के आकस्मिक निधन अगस्त 2020 म होगे। उन्कर परिवार बेसहारा होगे अउ आर्थिक स्थिति डांवाडोल हो गे। प्रदेश सरकार ​ये नियम ले मृतक करमचारी सुनील गायकवाड़ के बेटी कु. अंकिता ल सहायक ग्रेड-03 के पद म तुरते नियुक्ति मिल गे,जेकर ले उन्कर परिवार ल सहारा मिलगे । रसायन विज्ञान म एमएमसी तक शिक्षित अंकिता घर चलाए बर लइका मन ल ट्यूशन पढ़ाए ले परिवार ल सहारा मिलीस, फेर ये ह नाकाफी रिहिस। इही बीच छत्तीसगढ़ सरकार कोति ले कोरोना काल म कोनो शासकीय सेवक के मउत म 10 प्रतिशत के बंधना ल खतम करके अनुकम्पा देहे के आदेश मिलीस जेकर फायदा गायकवाड़ परिवार ल तको मिलीस। जिला शिक्षा अधिकारी ह कु. अंकिता ल सहायक ग्रेड-03 के पद म शिवसिंह वर्मा शासकीय आदर्श उच्चतर माध्यमिक विद्यालय धमतरी म अनुकम्पा नियुक्ति प्रदान करीन । उन मन कहीन कि पिता के नइ होए ले परिवार के अधूरापन कभू खतम नइ होवय, फेर छत्तीसगढ़ सरकार ह एक पिता के भूमिका निभावत अनुकम्पा नियुक्ति प्रदान करीन। अंकिता ह कहीन कि वोेह कभू सोचे नइ रिहिन कि अनुकम्पा नियुक्ति के अबड़ अकन लंबित प्रकरण मन के बीच ओला नौकरी अ​तेक जल्दी मिल पाही। प्रदेश सरकार के संवेदनशीलता के चलत ही ये ह सम्भव हो पाईस अउ आज वोह अपन परिवार बर कुछु करे के लईक सक्षम हो पाईस। उन् मन मुख्यमंत्री भूपेश बघेल अउ उन्कर सरकार के प्रति अभार प्रकट करत ये निर्णय ल ऐतिहासिक बताईस।