स्वतंत्रता दिवस म नई दिल्ली म छत्तीसगढ़ के जशपुर जिला के ए.एन.एम. अउ मितानिन सम्मानित

मुख्यमंत्री श्री विष्णु देव साय अऊ स्वास्थ्य मंत्री श्री श्याम बिहारी जायसवाल ह दीन बधाई अऊ शुभकामना
कर्त्तव्य पथ म स्वतंत्रता दिवस के राष्ट्रीय कार्यक्रम  म विशेष अतिथि के रूप म होइन सामिल
जशपुर जिला के पाकरगांव के ए.एन.एम. श्रीमती निग्मा लांबा अउ कुनकुरी के मितानिन श्रीमती अमीषा बाई ल करे गीस सम्मानित

जशपुर, 17 अगस्त 2024। स्वतंत्रता दिवस म नई दिल्ली म छत्तीसगढ़ के जशपुर जिला के ए.एन.एम. अउ मितानिन ल विषम परिस्थिति मन म आमजन तक स्वास्थ्य सुविधा मन ल पहुँचाए के उत्कृष्ट काम बर सम्मानित करे गीस। 78वां स्वतंत्रता दिवस के पूर्व संध्या म नई दिल्ली के विज्ञान भवन म आयोजित कार्यक्रम म केंद्रीय स्वास्थ्य मंत्री श्री जे.पी. नड्डा, केंद्रीय स्वास्थ्य अउ कल्याण राज्य मंत्री श्रीमती अनुप्रिया पटेल अउ श्री प्रतापराव जाधव ह छत्तीसगढ़ के जशपुर जिला के आयुष्मान आरोग्य मन्दिर पाकरगांव, विकासखंड पत्थलगांव म कार्यरत ए.एन.एम. श्रीमती निग्मा लांबा अउ ग्राम पंडरीपानी, विकासखंड कुनकुरी के मितानिन श्रीमती अमीषा बाई ल स्मृति चिन्ह अऊ शॉल भेंट करके सम्मानित करिन।

मुख्यमंत्री श्री विष्णु देव साय, स्वास्थ्य मंत्री श्री श्याम बिहारी जायसवाल अऊ स्वास्थ्य विभाग के अपर मुख्य सचिव श्री मनोज पिंगुआ ह ए.एन.एम. श्रीमती निग्मा लांबा अउ कुनकुरी के मितानिन श्रीमती अमीषा बाई ए उपलब्धि बर बधाई अऊ शुभकामना देहे हे।

कार्यक्रम के आयोजन स्वास्थ्य अउ परिवार कल्याण मंत्रालय भारत सरकार कोति ले करे गीस। ए कार्यक्रम म देश के 34 राज्य ले चुने गए ए.एन.एम. अउ आशा (मितानिन) कार्यकर्ता मन ल अतिथि मन के संग वार्ता बर आमंत्रित करे गए रहिस। स्वतंत्रता दिवस 15 अगस्त ल नई दिल्ली के कर्त्तव्य पथ के परेड म जशपुर जिला के पाकरगांव के ए.एन.एम. श्रीमती निग्मा लांबा अउ कुनकुरी के मितानिन श्रीमती अमीषा बाई अपन पति श्री बिहारी दास के संग विशेष अतिथि के रूप म छत्तीसगढ़ राज्य कोति ले संघरिन।

छत्तीसगढ़ ह मुख्यमंत्री श्री विष्णु देव साय के अगुवई अउ स्वास्थ्य मंत्री श्री श्याम बिहारी जायसवाल के मार्गदर्शन म स्वास्थ्य के क्षेत्र म निरंतर प्रगति करत हे। राष्ट्रीय स्वास्थ्य मिशन अन्तर्गत कई ठन स्वास्थ्य सूचकांक मन म दिन प्रतिदिन सुधार होवत हे। छत्तीसगढ़ म राष्ट्रीय स्वास्थ्य मिशन छत्तिसगढ़ कोति ले पाछू दिन म 171 चिकित्सक अऊ 25 विशेषज्ञ के नवा पदस्थापना करे गए हे जेन स्वास्थ्य सुविधा के विस्तार म एक बड़का कदम हे।