रायपुर, 1 मार्च 2024। छत्तीसगढ़ म दानवीर मनखे मन के कमी नइ हे। वइसे दान देहे के परम्परा हमार समाज म अड़बड़ जुन्ना हे। इहां नवा फसल के खुशी म छेरछेरा पर्व म दान देहे के परंपरा हे। ये हमार समाज के दानशीलता के उदाहरण हे। हमार शास्त्र मन म घलोक अन्नदान ल महादान के संज्ञा देहे गए हे।
छत्तीसगढ़ सरकार लइका मन म कुपोषण दूर करे बर समाज के इही परम्परा के सहारा लेवत हे। प्रधानमंत्री पोषण शक्ति योजना म समुदाय के भागीदारी जोड़त न्योता भोजन के अनूठा पहल करे गए हे। मुख्यमंत्री श्री विष्णु देव साय ह अपन गृह ग्राम बगिया म आश्रम शाला के लइका मन ल अपन जन्मदिवस म न्योता भोजन करात एखर योजना के शुरूआत करे हें।
छत्तीसगढ़ म स्कूली लइका मन ल अब नियमित रूप ले मिलत भोजन के अलावा समाज के अग्रणी अऊ सक्षम मनखे मन के संग न्योता भोजन म पौष्टिक अऊ रूचिकर खाद्य सामान मिलही। ‘न्योता भोजन’ तीन प्रकार के हो सकत हे – पूर्ण भोजन (शाला के सबो कक्षा बर), आंशिक पूर्ण भोजन (शाला के कोनो कक्षा विशेष बर), अकतहा पूरक पोषण सामान।
दान-दाता मन के भोजन चयन स्कूल क्षेत्र के खान-पान के आदत (फुड हैबिट) के अनुसार होना चाही। पूर्ण भोजन के स्थिति म नियमित रूप ले देवइया भोजन के समान लइका मन ल दाल, सब्जी अऊ चावल सबो देहे जाही। फल, दूध, मिठाई, बिस्किट्स, हलवा, चिक्की, अंकुरित खाद्य पदार्थ जइसे सामान, जेन लइका मन ल पसंद हो एकर चुनाव अकतहा पूरक पोषण सामान के रूप म करे जा सकत हे। पौष्टिक अउ स्वादिष्ट मौसमी फल के चयन घलोक पूरक पोषण सामान के रूप म करे जा सकत हे।
न्योता भोजन के उद्देश्य समुदाय के बीच अपनेपन के भावना के विकास, भोजन के पोषक मूल्य म वृद्धि अउ सबो समुदाय वर्ग के लइका मन म समानता के भावना विकसित करना हे। ए योजना म समाज के अग्रणी अऊ सक्षम मनखे मन के अलावा सामाजिक संगठन, स्कूल म अध्ययनरत पढ़ईया लईका मन ल पूर्ण भोजन के योगदान कर सकत हें या अकतहा पूरक पोषण के रूप म खाद्य सामान के योगदान कर सकत हें। ये स्कूल म जेन भोजन देहे जात हे वोकर विकल्प नो हे, भलुक ये पढ़ईया लईका मन ल देहे जात भोजन के पूरक होही।
न्योता भोजन समुदाय के सक्षम मनखे विवाह के वर्षगांठ, जन्मदिन, राष्ट्रीय पर्व आदि विशेष अवसर म स्कूली लइका मन ल पौष्टिक भोज्य पदार्थ दे सकहीं। ये पूर्ण रूप ले ऐच्छिक होही। दानदाता स्कूली लइका मन ल मौसमी फल, दूध, मिठाई, बिस्किट, हलवा, अंकुरित खाद्य पदार्थ आदि वितरित कर सकत हें। न्यौता भोजन बर लइका मन के रूचि के मुताबिक दानदाता खाद्य पदार्थ के चयन कर सकत हें।
अन्नदान महादान: स्कूली लइका मन ल ‘न्योता भोजन’ म मिलही पौष्टिक आहार
