तकनीक अऊ पारदर्शिता के नवा तस्वीर: अन्नपूर्ति ग्रेन एटीएम
बिलासपुर, कभू राशन लेहे बर लंबा लेन म खड़े होके अपन पारी के अगोरा करे ल परत रहिस, फेर अब सरकंडा म शुरू हुए ”अन्नपूर्ति ग्रेन एटीएम” के नवा व्यवस्था म राशन लेहे के प्रक्रिया कुछेक मिनट म पूरा होवत हे। तकनीक ले जुड़े ए पहल के शुरुआत के संगेच हितग्राही मन ल समय के बचत, सटीक तौल अऊ पारदर्शी वितरण के अनुभव मिले लगे हे।
चिंगराजपारा के रहवइया हितग्राही प्रीति मानिकपुरी बर राशन लेहे के अनुभव अब पहिली ले अलग हे। ओ बताथे के अब लंबा लाइन म खड़े होके अगोरा नइ करे ल परै। मशीन के माध्यम ले राशन मिले ले प्रक्रिया आसान होगे हे अऊ तौल ल लेके घलोक कोनो चिंता नइ रहै। अइसनहे हितग्राही दुर्गेश कुमार यादव बताथे के ग्रेन एटीएम म बायोमेट्रिक प्रमाणीकरण के बाद स्क्रीन म ओखर पात्रता के मुताबिक मिलइया राशन के मात्रा स्पष्ट रूप ले दिखाई देथे। पुष्टि करे के बाद डिस्पेंसर के तरी झोला या बोरा रखतेच निर्धारित मात्रा म चांउर सीधा झोला या बोरा म भर जाथे। ओखर बर ए अनुभव न केवल आसान हे, बल्कि राशन के मात्रा ल लेके भरोसा घलोक बढ़ावत हे।
ग्रेन एटीएम के संचालिका रिंकू सिंह ठाकुर बताथे के नवा व्यवस्था ले राशन वितरण के काम जादा व्यवस्थित होवत हे। मशीन आधारित प्रक्रिया के सेती भीड़ ल नियंत्रित करे, समय बचाए अऊ निर्धारित मात्रा म राशन उपलब्ध कराए म सुविधा मिलत हे।
तकनीक के संग बाढ़त हे भरोसा
”अन्नपूर्ति ग्रेन एटीएम” सार्वजनिक वितरण प्रणाली म तकनीक के उपयोग के दिशा म एक नवा पहल हे। बायोमेट्रिक प्रमाणीकरण ले लेके स्क्रीन म पात्रता के जानकारी अऊ निर्धारित मात्रा म राशन के अपने-आप वितरण तक पूरा प्रक्रिया हितग्राही के आगू होथे। एकर से वितरण व्यवस्था म पारदर्शिता अऊ जवाबदेही ल मजबूती मिलत हे। अभी ए नवा व्यवस्था के शुरुआत होए हे, फेर शुरुआती अनुभव म ही एकर सबसे महत्वपूर्ण असर दिखाई देहे लगे हे। राशन लेहे म लगइया समय कम होए हे अऊ हितग्राही मन के भरोसा बाढ़े हे। अवइया बेरा म ए पहल सार्वजनिक वितरण प्रणाली ल अऊ जादा सरल, पारदर्शी अऊ तकनीक आधारित बनाए के दिशा म महत्वपूर्ण कदम साबित हो सकत हे।
छत्तीसगढ़ शासन के ए अभिनव पहल तकनीक ल जनसुविधा ले जोड़त ए संदेश देवत हे के शासन के योजना मन के लाभ केवल उपलब्ध कराना ही न ही, बल्कि ओला सम्मानजनक, सरल, पारदर्शी अऊ समयबद्ध तरीका ले हितग्राही मन तक पहुँचाना घलोक ओतकेच महत्वपूर्ण हे।
