पुलिस टीम ल ढाई लाख रूपिया ईनाम देहे के घोषणा
रायपुर 29 जनवरी 2020। गृह मंत्री श्री ताम्रध्वज साहू ह आज अपन रायपुर निवास परिसर म रायपुर के उद्योगपति श्री प्रवीण सोमानी ल अपहरणकर्ता मन के चंगुल ले सकुशल वापस लाय म पुलिस टीम ल बधाई अऊ शुभकामना दीन। ये बेरा म रायपुर रेंज के पुलिस महानिरीक्षक श्री आनंद छाबड़ा अऊ वरिष्ठ पुलिस अधीक्षक रायपुर श्री आरिफ शेख घलोक उपस्थित रहिन। गृह मंत्री ह पुलिस महानिरीक्षक अऊ पुलिस अधीक्षक के नेतृत्व म अपहरण कांड म तुरते काम करे अऊ फेर मिले सफलता बर पुलिस अधिकारी मन अऊ कर्मचारी मन ल शाबाशी दीन अऊ कहिन कि भविष्य म अइसनहे लउहे काम करत रहव। गृह मंत्री ह पुलिस टीम ल प्रशंसनीय काम बर ढाई लाख रूपिया ईनाम देहे के घोषणा करिन। वरिष्ठ पुलिस अधीक्षक श्री शेख ह अपहरणकर्ता मन के धर-पकड़ बर जइसन कार्रवाई करे गए रहिस तेला सरसरी तौर म उमन ल जानकारी दीन।
