कांकेर, मनखे मन ले भेंट-मुलाकात बर कांकेर जिला पहुंचे मुख्यमंत्री श्री भूपेश बघेल ह आज दुर्गूकोंदल म एक स्कूली छात्रा कोति ले शाला भवन नइ होए के सेती अध्ययन-अध्यापन म आवत दिक्कत मन के कोति ध्यान आकर्षित करिस। ए बात म मुख्यमंत्री ह स्कूल बर भवन के निर्माण के घोषणा कर दीन। शासकीय उच्चतर माध्यमिक शाला मेड़ो के छात्रा वंदना दीवान ह भेंट-मुलाकात म मुख्यमंत्री ल बताइस कि भवन नइ होए के सेती स्कूल के छात्र-छात्रा मन ल पढ़ई-लिखई म बहुत परेशानी होवत हे। मेड़ो म साल 2013 ले हाईस्कूल के संचालन होवत हे। फेर एखर बर भवन नइ बन पाए हे। ओ ह मुख्यमंत्री ले अपन स्कूल बर भवन बनाए के मांग करिस।
संवेदनशील मुख्यमंत्री श्री भूपेश बघेल ह छात्रा के मांग के आधा घंटा के भीतर ही शासकीय उच्चतर माध्यमिक विद्यालय मेड़ो बर नवा भवन बनाए के घोषणा कर दीन। दुर्गूकोंदल म भेंट-मुलाकात कार्यक्रम म ही मुख्यमंत्री ह ए घोषणा करके छात्रा के मांग तुरंते पूरा करिस। भेंट-मुलाकात के बाद मेड़ो स्कूल के छात्रा मन ह मुख्यमंत्री ल गुलदस्ता भेंट करके ऊंखर प्रति आभार व्यक्त करिन।
मुख्यमंत्री श्री भूपेश बघेल ह तुरंते पूरा करिस छात्रा के मांग, हाईस्कूल बर भवन निर्माण के घोषणा करिन
