फ़िल्म जगत ल लगिस एक अउ बड़का झटका, मशहूर कोरियोग्राफर सरोज खान के निधन

मुंबई, 3 जुलाई 2020। फिल्म जगत के मशहूर कोरियॉग्रफर सरोज खान के शुक्रवार देर रात ह्रदय गति रूके के सेती ले मुंबई म निधन होगे. वो 71 साल के रहिस. कुछ दिन पहली ही सरोज खान ल मुंबई के गुरु नानक हॉस्पिटल म भर्ती कराये गे रहिस. ओला सांस ले म तकलीफ के शिकायत के बाद अस्पताल म भर्ती कराये गे रहिस. अस्पताल प्रशासन के अनुसार आज देर रात 1.52 मिनट म वो अंतिम सांस लिस. सरोज खान के निधन ओखर चाहने वाला मन बर बड़का झटका हे. फिल्म जगत म ओला काफी सम्मान ले देखे जात रहिस. सरोज खान ल मुंबई के चारकोप कब्रिस्तान म आज सुपुर्द-ए-खाक करे जाही. सरोज खान मात्र तीन साल के उमर ले बतौर बैकग्राउंड डांसर अपन करियर फिल्म जगत म शुरू करे रहिस. वो 1974 ले बतौर कोरियॉग्राफर फिल्म इंडस्ट्री म अपन सफर शुरू करिस. ओ मन अपन करियर म दू हजार ले घलो जादा गाना ल कोरियॉग्राफ करे हे. सरोज खान ल तीन बार नैशनल अवॉर्ड घलो मिले हे.