अनुकंपा नियुक्ति म मुख्यमंत्री के निर्णय के लाभ : शिक्षा विभाग म 42 झन ल मिलीस सरकारी नौकरी

बेलासपुर 02 जून 2021 बुधवार। अनुकंपा नियुक्ति प्रकरण म 10 प्रतिशत के सीमा ​ढील्ला करे मुख्यमंत्री दाउ भूपेश बघेल के निर्णय ले जवान मन सरकारी नौकरी के दुवार खुल गे । ये सीमा 31 मई 2022 तक बर ढील्ला करे गे हे। सीमा के ढील होए ले शिक्षा विभाग म 42 करमचारी मन के बच्चा मन बर रोजगार के रद्दा खुल गे।
आज मंथन सभाकक्ष म कलेक्टर डॉ. सारांश मित्तर ह प्रतीकात्मक रूप ले शिक्षा विभाग बर नियुक्ति पत्र 6 झिन युवा मन ल सौंपिन। कलेक्टर ह युवा मन ल प्रेरित करत कहिन कि आपमन पूरा निष्ठा के संग सौंपे गे दायित्व के निर्वहन करहू। अनुकंपा नियुक्ति शासकीय सेवक के सेवा कार्य के दौरान असामयिक मउत के पीछू आश्रित मन के अधिकार हरे। जेन 42 लोगन ल अनुकंपा नियुक्ति दिए गइन ओमे 39 सहायक ग्रेड-03 अउ 03 पद भृत्य के संघरे हे। येमे 15 झिन युवा अइसन हे जिन्कर परिजन मन के असामयिक मृत्यु कोविड के कारण होए रिहिस।
नियुक्ति पत्र पाए के पीछू युवा मन ह बताइन कि मुख्यमंत्री दाउ भूपेश बघेल के निर्णय ले हमार परिवार ल बड़का राहत मिलिस हे। कैबिनेट के निर्णय के पीछू आसरा रिहिसे कि लउहे अनुकंपा नियुक्ति मिल जाही फेर अतका लउहे मिल जाही ये मालूम नइ रिहिसे।
कार्यक्रम म एडीएम सुश्री नुपूर राशि पन्ना, प्रभारी जिला शिक्षा अधिकारी श्री पी. दासरथी अउ शिक्षा विभाग के सहायक संचालक श्री संदीप चौपड़े संघरे रिहिन।