अनुकंपा नियुक्ति ले सुधरिस दिग्विजय के परिवार के आर्थिक हालत

बेलासपुर, 17 जून 2021। कोरोना के कठिन दौर म जब आजीविका के समस्या होए लगे रहिस तब मुख्यमंत्री श्री भूपेश बघेल के राहत भरे फैसला ह दिग्विजय के जिंदगी बदल दीस। अनुकंपा नियुक्ति ले ओला आर्थिक संबल मिलीस अऊ अब ओखर परिवार के आर्थिक हालत म सुधार होवत हे।
जिला के ग्राम मंगला निवासी श्री दिग्विजय कौशिक के पिता श्री ईश्वर प्रसाद कौशिक कन्या पूर्व माध्यमिक शाला सैदा म प्रधानपाठक के पद म कार्यरत रहिन। साल 2019 के फरवरी महिना म एक दुर्घटना म उंखर आकस्मिक मृत्यु हो गए रहिस। पिता के मृत्यु के बाद दिग्विजय ह अनुकंपा नियुक्ति बर जिला शिक्षा अधिकारी कार्यालय म आवेदन लगाए रहिस, फेर अनुकंपा के कोटा म तीसर श्रेणी के कोनो पद नइ रहिस ते पाए के ओखर आवेदन दू साल ले लंबित रहिस। मुख्यमंत्री श्री भूपेश बघेल के पहल म कोरोना काल म छ.ग. शासन कोति ले अनुकंपा नियुक्ति के कोटा म 10 प्रतिशत के सीमा ल 31 मई 2022 तक शिथिल करे के बाद ओला सहायक ग्रेड 3 के पद म नियुक्त के अवसर मिलीस। दिग्विजय ल 2 जून 2021 के कलेक्टर के हाथ नियुक्ति पत्र मिल गीस। ओ ह 11 जून 2021 के शासकीय हाईस्कूल धौंराभाठा विकासखण्ड कोटा म सहायक ग्रेड 3 के पद म कार्यभार ग्रहण करिस। दिग्विजय ह बी.कॉम. के डिग्री के बाद पीजीडीसीए, आईटीआई अऊ डीएड के कोर्स करे हे। दिग्विजय ह बताइस के वो प्राइवेट जॉब करत रहिस फेर ओखर आमदनी बहुत कम रहिस। ते पाए के पिताजी के निधन के बाद ओ प्रायवेट जॉब छोड़ देहे रहिस अऊ अनुकंपा नियुक्ति बर आवेदन लगाए रहिस। नौकरी के अगोरा म ओखर आर्थिक हालत दिनों दिन खराब होवत रहिस। परिवार म 3 बहिनी अऊ दादी हे जिंकर जिम्मेदारी घलोक ओखर ऊपर हे। ओ ह मुख्यमंत्री के आभार व्यक्त करत कहिस कि ऊंखर ये संवेदनशील फैसला के सेती ही ओला ये नौकरी मिल पाईस।