- नियम म बदलाव: अब प्राधिकरण के माध्यम ले स्वास्थ्य, शिक्षा, पेयजल जइसे महत्वपूर्ण काम घलोक स्वीकृत करे जा सकही
- नवा काम मन के स्वीकृति बर जिला कलेक्टर 10 जुलाई तक जनप्रतिनिधि मन के बैठक लेके प्रस्ताव भेजहीं
रायपुर, मुख्यमंत्री श्री भूपेश बघेल के अध्यक्षता म आज इहां मंत्रालय म अनुसूचित जाति विकास प्राधिकरण के बैठक आयोजित करे गीस। बैठक म बताइए गीस कि नवा सरकार कोति ले साल 2005 म बनाय गे अनुसूचित जाति विकास प्राधिकरण निधि नियम म संशोधन करे गए हे। पहिली जिहां निर्माण कार्य म जोर रहिस, उन्हें संशोधन के बाद अब स्वास्थ्य, शिक्षा, पेयजल, जल संरक्षण, पशु सेवा, रोजगार मूलक योजना, कौशल उन्नयन जइसे आन महत्वपूर्ण बिन्दु म घलोक काम करे जा सकही। इंकर माध्यम ले हितग्राही मूलक अउ सामुदायिक योजना मन ल स्वीकृत करे जाही।
मुख्यमंत्री ह कहिन कि प्राधिकरण के अंतर्गत स्वीकृत राशि के कार्य मन ले हितग्राही अऊ समुदाय के जीवन म बदलाव आना चाही। उमन कहिन कि जनप्रतिनिधि शिक्षा, स्वास्थ्य अऊ रोजगार के संबंध म सुझाव देवव, त ऊंखर अमल ले हितग्राही मन के जीवन म सकारात्मक बदलाव आही। बैठक म सदस्य मन ह ए नियम मन म बदलाव के स्वागत करिन अऊ कहिन कि एखर से अनुसूचित जाति वर्ग के आर्थिक सामाजिक विकास म मदद मिलही।
मुख्यमंत्री ह कहिन कि प्राधिकरण के माध्यम ले मिनी माता स्वावलंबन योजना के तहत अनुसूचित जाति वर्ग के युवा मन ल व्यवसायिक प्रशिक्षण देके दुकान अउ कार्यशील पूंजी बर 2 लाख तक के राशि दीए जात हे। अइसन अनुसूचित जाति वर्ग के किसान मन के असाध्य पंप मनके ऊर्जीकरण बर अनुदान राशि दीए जात हे। मुख्यमंत्री ह योजना मनल सामान्य जन तक पहुंचाए बर व्यापक प्रचार-प्रसार करे के निर्देश दीन। उमन ये संबंध म पाम्पलेट के वितरण अऊ दीवार लेखन जइसे काम करे के संगें-संग जनप्रतिनिधि मन ले आग्रह करिन कि ओ मन नागरिक मन ले बातचीत अउ सम्पर्क के समय ओ मन ल ए योजना मन के जानकारी देवव, जेखर से जादा ले जादा जरूरतमंद मनखे मन ल लाभान्वित करे जा सकय।
बैठक म मुख्यमंत्री कहिन कि प्राधिकरण के तहत नवा कार्य ल स्वीकृति प्रदाय करे बर लिए जिला कलेक्टर मन ल निर्देशित करे जाही। सबो संबंधित जिला कलेक्टर अपन जिला मन म जनप्रतिनिधि मन ले प्रस्ताव प्राप्त करके अउ बैठक लेके प्राथमिकता आधार म प्रस्ताव 10 जुलाई तक प्राधिकरण ल भेजना सुनिश्चित करव।
बैठक म मुख्यमंत्री के उप सचिव अऊ आयुक्त-सह-संचालक जनसंपर्क संचालनालय श्री तारण प्रकाश सिन्हा ह ऑडियो-वीडियो प्रदर्शन के माध्यम ले प्राधिकरण के नियम मन म करे गए बदलाव अऊ प्राधिकरण के माध्यम ले कार्य मन के अऊ बजट अउ संचालित कार्य मन के जानकारी दीन।
बैठक म अनुसूचित जाति अउ जनजाति विकास मंत्री डॉ. प्रेमसाय सिंह टेकाम, गृह अउ लोक निर्माण मंत्री श्री ताम्रध्वज साहू, कृषि मंत्री श्री रविन्द्र चौबे, लोक स्वास्थ्य यांत्रिकी मंत्री गुरू रूद्र कुमार, नगरीय प्रशासन अउ श्रम मंत्री डॉ. शिव कुमार डहरिया, महिला अउ बाल विकास मंत्री श्रीमती अनिला भेंड़िया, विधायकगण, जिला पंचायत के अध्यक्षगण, मुख्य सचिव श्री सुनील कुजूर, पुलिस महानिदेशक श्री डी. एम. अवस्थी, अपर मुख्य सचिव सर्वश्री के.डी.पी. राव, आर. पी. मण्डल, मुख्यमंत्री के प्रमुख सचिव श्री गौरव द्विवेदी, जिला कलेक्टर उपस्थित रहिन।