लइका मन ले पूछिस रोज अइसन ही खाना बनथे का: लइका मन ह कहिन हव बनथे
परिसर म रोपिस लीम के पौधा
मुख्यमंत्री श्री भूपेश बघेल ह आज दुर्ग जिला के ग्राम मर्रा (विकासखण्ड पाटन) के शासकीय पूर्व माध्यमिक शाला म लइका मन के संग जमीन म बिछे दरी म बइठके गरमा-गरम स्वादिष्ट मध्यान्ह भोजन करिस। ये दौरान उमन लइका मन ले अड़बड़ मया के संग गोठ-बात करिन अऊ उंखर पढ़ई-लिखई के जानकारी लीन। मुख्यमंत्री ह लइका मन ले पूछिन के रोज अइसनहे खाना बनथे, लइका मन ह बताइस हव दाल, चावल, सब्जी अऊ आचार अऊ समय-समय म खीर घलोक परोसे जाथे।
शाला के कक्षा 8वीं के युगल किशोर, पूजा अऊ कक्षा 7वीं के सुरुचि कोसले संग बहुत अकन लइका मन ह मुख्यमंत्री के संग बइठ के जेवन करिन अऊ मुख्यमंत्री ल अपन परिचय दिन। लइका मन ह बताइन कि मुख्यमंत्री के संग भोजन करके ओ मन ल बिक्कट मजा आइस। स्कूल शिक्षा मंत्री डॉ. प्रेमसाय सिंह टेकाम, विधायक श्री आशीष छाबड़ा अऊ स्कूल शिक्षा विभाग के प्रमुख सचिव श्री गौरव द्विवेदी ह घलोक ये बेरा म ऊंखर संग भुइंया म बइठके जेवन करिस।
मर्रा के ये स्कूल म 170 लइका पढथें। मध्यान्ह भोजन म लइका मन ल हर दिन अलग-अलग मेनू म जेवन परोसे जाथे। आज मंगल के दिन लइका मन ल भात अउ राहेर के दार के संग आलू-परवल अऊ आलू-चना के साग अऊ खीर परोसे गीस।
मुख्यमंत्री ह शाला परिसर म लीम के पौधा रोपिन
आये सगा मन ह घलोक परिसर म लीम के संग आंवला, करंज, जामुन, आम अऊ अमलतास के पौधा रोपिन। शाला परिसर म लइका मन ह एक बाड़ी घलोक लगाए हे, जेमां तुमा, भाटा, टमाटर अऊ मिरचा जइसन साग-भाजी अऊ केला, पपीता अऊ कटहर के फलदार पौधा लगाए हें। ये बेरा म उन्हा दुर्ग संभाग के कमिश्नर श्री दिलीप वासनिकर, शासकीय पूर्व माध्यमिक शाला मर्रा के प्रधान पाठक श्री गंगूराम साहू ये बेरा म उपस्थित रहिन।
