गलत अऊ भरमाए वाला सूचना मन के लेहे-देहे म होही कड़ा कार्रवाई
रायपुर, 01 अप्रैल 2020। राज्य शासन ह प्रदेशवासी मन ले अपील करे हे के एक अप्रेल के दिन मनखे मन ल अप्रेल फूल बनाए म कोनो प्रकार के अफवाह या भरमाए वाला समाचार झन फैलावव। भरमाए वाला समाचार फैलाए म संबंधित के विरूद्ध कड़क कार्रवाई करे जाही।
राज्य शासन ह अपील करे हे के कोरोना वायरस के रोकथाम बर लाकड़ाउन करे गए हे। सबो नागरिक अपन घर म ही रहंय। कोरोना एडवाइजरी के अक्षरशः पालन करयं। बहुतेच जरूरी काम या राशन सामान के खरीदी बर प्रशासन के निरधारित छूट के बेरा म सोशल डिस्टेंसिंग के पालन करत सामान खरीदी करे ल जायं। लॉकडाउन म धारा 144 के उल्लंघन होए म कड़क कार्रवाई करे जाही।
एक अप्रेल के दिन आमतौर म अप्रेल फूल दिवस, एक-दूसर ल मूरख बनाए के परम्परा हे फेर अभी हाल म कोरोना संकट अऊ लॉकडाउन के स्थिति ल देखत ये दिन कोनो अइसन बात या अफवाह झन फैलाए जाय जेखर से मनखे मन ल कठिनाई के सामना करना परय।
प्रदेशवासी मन सूचना के आदान प्रदान म पूरा सर्तकता अऊ गंभीरता बरतयं। मनखे मन ल ये बात बर घलोक जागरूक करयं के अनजाने म उंखर एक गलती प्रशासन अऊ मनखे मन बर परेशानी के सबब बन सकत हे। अइसन हरकत अभी हाल के हालत म बर्दश्त नइ करे जा सकय। अइसन मनखे मन ले कड़ाई ले निपटे जाही। ए मनखे मन के विरूद्ध सख्त कार्रवाई करे के हुकुम पुलिस अधिकारी मन ल देहे गए हे।
