- छत्तीसगढ़ म लॉकडाउन अभी जारी रइही
- अइसन जरूरतमंद मनखे जिंकर तिर अभी हाल म कोनो कारन से राशनकार्ड नइ हे, ओ मन ल घलोक एक महिना के राशन निःशुल्क प्रदान करे जाही
- मुख्यमंत्री ह कोरोना संक्रमण के रोकथाम उपर प्रदेशवासी मन के संयम, आत्मविश्वास, सहयोग अऊ जागरूकता ल सहराईन
- नियमित रूप ले मास्क पहिने, हाथ धोत रहे अऊ फिजिकल डिस्टेंसिंग के ध्यान रखे के अपील
- सबके संयम, अनुशासन अऊ आत्मबल के सहारे ही ये महामारी ल हराबोन
रायपुर, 16 अप्रैल 2020। मुख्यमंत्री श्री भूपेश बघेल ह काली जनता के नाम अपन संदेश म कहे हें के कोरोना वायरस के संक्रमण ले बचाव व रोकथाम बर लागू लॉकडाउन छत्तीसगढ़ म अभी जारी रइही, 21 अप्रैल ले कोरोना वायरस संक्रमण के स्थिति के समीक्षा के बाद परिस्थिति के मुताबिक निर्णय ले जाही। जऊन जिला मन म कोरोना वायरस संक्रमण उपर नियंत्रण होही ओ मन ल गाइडलाइन के मुताबिक छूट प्रदान करे जाही। एखर बर ये जरूरी हे के हम अपन-अपन जिला मन म लॉकडाउन के कड़ाई ले पालन करन। हम सबो सरलग मास्क पहिरन, हाथ धोत रहन अऊ फिजिकल डिस्टेंसिंग म विशेष ध्यान देवन।
मुख्यमंत्री ह कहिन के हम म ले अधिकांश के जीवन म एकर जइसे के संकट के सामना करे के ये पहिली अवसर ये। फेर इही बेरा ह हमार आत्मबल, संयम अऊ विश्वास के परीक्षा के घलोक हे। प्रदेशवासी मन के सहयोग ले छत्तीसगढ़ म कोरोना वायरस के संक्रमण नियंत्रण म हे। लॉक डाउन के पहिली चरण म सबो ह जऊन संयम, आत्मविश्वास अऊ जागरूकता देखाए हें उंकर सब बर मैं आभार व्यक्त करत हंव। जतका जल्दी आप के शहर, आप के जिला कोरोना वायरस के संक्रमण ल नियंत्रण म रखही वोतके जल्दी आप मन ल लॉक डाउन म छूट देहे उपर विचार करे जाही।
मुख्यमंत्री ह अपन संदेश म कहे हें के राज्य सरकार ह ये संकल्प लेहे हे के ये संकट के घड़ी म हम छत्तीसगढ़ म कोनो ल भूखा नइ सोन दन। राज्य म 56 लाख राशन कार्डधारी मन ल निःशुल्क राशन देहे के फैसला करे गए हे। एमां ले करीबन सबो मनखे मन ल करीबन दू महिना के राशन निःशुल्क प्रदान करे गए हे। नवा राशन कार्ड बनाए के काम घलोक युद्धस्तर म चलत हे। राज्य सरकार ह ये घलोक तय करे हे के अइसन जरूरतमंद मनखे जिंकर तिर अभी हाल म कोनो कारन से राशनकार्ड नइ हे, ओ मन ल घलोक एक महिना के राशन निःशुल्क प्रदान करे जाही।
श्री बघेल ह कहिन के छत्तीसगढ़ म आन राज्य ले श्रमिक या कामगार आये हें अऊ इहां के विकास म, निर्माण म लगे हें। ओ मन ल अपन घर जाय बर परेशान होए के जरूरत नइ हे। जब तक लॉक डाउन रइही, तब तक छत्तीसगढ़ ल ही आप मन अपन घर समझव। अइसन सबो श्रमिक मन के भोजन अऊ अस्थायी घर के पूरा प्रबंध राज्य सरकार करत हे।
मुख्यमंत्री ह कहिन के छत्तीसगढ़ के जऊन श्रमिक भाई-बहिनी उत्तर भारत, दिल्ली, महाराष्ट्र, तेलंगाना, आंध्रप्रदेश या आन राज्य मन म हे, उमन ले घलो आग्रह हे के वो मन उहें रहव। उहां के राज्य सरकार ले हमर चर्चा लगातार होवत हे, सबो के रहे, भोजन अऊ घर के सबो प्रबंध करे जात हे। श्रमिक मन के सहायता बर हेल्पलाइन के व्यवस्था करे गए हे अऊ नोडल अधिकारी घलोक नियुक्त करे गए हे, जऊन सरलग अइसन मनखे मन के मदद बर संबंधित राज्य सरकार मन के सम्पर्क म हें। इहां रहत परिवारजन मन बर घलोक चिंतित होए के जरूरत नइ हे, ओखर घलोक ख्याल रखे जात हे।
श्री बघेल ह कहिन के कोरोना वायरस संक्रमण के टेस्ट बर एम्स रायपुर अऊ जगदलपुर के अलावा अब मेडिकल कॉलेज रायपुर म घलोक सैम्पल टेस्ट के सुविधा चालू करे गए हे। एखर से जादा टेस्ट करे म मदद मिलही। संकट के ये समय म बहुत अकन स्वयंसेवी संस्था अऊ सामाजिक संगठन बढ़-चढ़के मनखे मन के मदद करत हें। ए संस्था मन के सहयोग अनुकरणीय अऊ प्रेरणादायक हे। ए संस्था मन ले आग्रह हे के स्थानीय प्रशासन के संग समन्वय बनाके काम करव अऊ फिजिकल डिस्टेंसिंग के पालन करव। श्री बघेल ह प्रदेशवासी मन ले कोरोना संकट के घड़ी म सहयोग के अपील करत उम्मीद जताईन के ये लड़ाई आप सब के सहयोग ले ही लड़े जात हे अऊ सबके संयम, अनुशासन अऊ आत्मबल के सहारेच हम कोरोना वायरस महामारी ल हराबोन।