रायपुर, भारत सरकार ह छत्तीसगढ़ म स्मारक, किला अऊ आन धरोहर संरचना मन के पहिचान अऊ संरक्षण बर व्यापक सर्वेक्षण करे हे अऊ पाछू पाँच बछर म ए काम मन बर ₹26.24 करोड़ के आवंटन करे हे। ये जानकारी संस्कृति अऊ पर्यटन मंत्री श्री गजेंद्र सिंह शेखावत ह आज राज्यसभा म सांसद श्रीमती फूलो देवी नेताम के सवाल के लिखित उत्तर म दीन।
मंत्री ह बताइन के भारतीय पुरातत्व सर्वेक्षण (एएसआई) ह साल 2014-15 ले 2024-25 तक छत्तीसगढ़ म गांव-गांव सर्वेक्षण करे हे। ए बेरा म 764 गांव मन के सर्वेक्षण होय हे, जेमें ले 73 गांव मन म प्राचीन अवशेष पाए गे हे, जेन राज्य के समृद्ध सांस्कृतिक धरोहर ल दर्शाथे।
उमन आगू कहिन के केंद्र सरकार ह छत्तीसगढ़ म केंद्र संरक्षित स्मारक अऊ स्थल मन के मरम्मत, संरक्षण अऊ रखरखाव के बर साल 2020-21 म ₹2.89 करोड़, 2021-22 म ₹4.78 करोड़, 2022-23 म ₹7.50 करोड़, 2023-24 म ₹5.94 करोड़ अऊ 2024-25 म ₹5.13 करोड़ के आवंटन करे हे। हर साल ये राशि पूरा खर्च करे गए हे।
मंत्रालय ह कहिस के ये पहल देश के मूर्त सांस्कृतिक धरोहर ल संरक्षित रखे अऊ अवइया पीढ़ि मन बर ऐतिहासिक महत्व के स्मारक अउ स्थल मन ल सुरक्षित बनाए बर सरलग चलाए जात उदीम मन के हिस्सा हे।
छत्तीसगढ़ म विरासत संरक्षण के बर केंद्र के बड़का कदम, ₹26.24 करोड़ के आबंटन
