कभू लोकतंत्र के खिलाप रहिके मतदान के बहिष्कार करइया कोण्टा के पहिली नक्सली एरिया कमेटी कमांडर अर्जुन ह एसो के निर्वाचन म मतदान दल के सुरक्षा म लगे हे। बस्तर म होए काली के मतदान के बेरा म लोकतंत्र के ये बड़का तिहार के बेरा म सुरक्षा के जिम्मा वो ह अपन खांधा म उठा लेहे हे।
वो ह 2001 ले 15 साल के उम्मर ले ही नक्सली मन के संग चल देहे रहिस। उहां रहिके वो ह नक्सल ट्रेनिंग लीस अउ धीरे-धीरे एरिया कमेटी कमांडर तक बन गए रहिस। अर्जुन कई नक्सली गतिविधि मन म संघरा रहिके बहुत अकन नक्सल वारदात मन ल अंजाम दे गे रहिस। पुलिस वोकर उपर आठ लाख रूपिया के इनाम घलोक रखे रहिस।
कुछ समय पहिली वो ह पुलिस के आघू आत्मसमर्पण कर दीस। अर्जुन ह साथी नक्सली मन ले परेशान होके समाज के मुख्यधारा म लहुटे के फैसला लीस। अर्जुन ह नक्सली मन के चुनाव बहिष्कार के फैसला ल सही नइ मानय। ओ कथे के नक्सली मन ल मुख्यधारा म लहुटना चाही अऊ लोकतंत्र म हिस्सा लेना चाही।
