जीवनदायिनी अरपा नदी छत्तीसगढ़ के गौरव अऊ हमर सांस्कृतिक पहिचान: मुख्यमंत्री श्री भूपेश बघेल

रायपुर, 16 मई 2021। मुख्यमंत्री श्री भूपेश बघेल ह कहिन के जीवनदायिनी अरपा नदी बिलासपुर के ही न ही छत्तीसगढ़ के गौरव ये। ये नदी हमर सांस्कृतिक पहिचान ले जुड़े हे। राज्य गीत के पहिली आखर घलोक अरपा नदी ल समर्पित हे। उमन कहिन के अरपा ल पुनर्जीवित करे अऊ प्रवाहमयी बनाए बर राज्य सरकार ह समय-समय म बहुत अकन कदम उठाए हे अऊ हम सरलग एखर बर हर संभव प्रयास करत रइबो। मुख्यमंत्री ह आज इहां अपन निवास कार्यालय म आयोजित वर्चुअल कार्यक्रम म बिलासपुर म 93 करोड़ 70 लाख रूपिया के लागत के अरपा उत्थान अउर तट संवर्धन काम के शिलान्यास करत ये आशय के विचार प्रकट करिन। कार्यक्रम के अध्यक्षता गृहमंत्री अउर जिला के प्रभारी मंत्री श्री ताम्रध्वज साहू ह करिन। गृह मंत्री अऊ विशिष्ट अतिथि के तौर म नगरीय प्रशासन अउर विकास विभाग के मंत्री डॉ. शिवकुमार डहरिया वर्चुअल रूप ले कार्यक्रम म जुड़े रहिन।