कला, संस्कृति, पर्यटन अउ पुरातत्व संवर्धन बर गठित टास्क फोर्स के बैठक म आइस कई महत्वपूर्ण सुझाव

रायपुर, 14 जुलाई 2021। छत्तीसगढ़ म कला, संस्कृति, पुरातत्व अउ पर्यटन संवर्धन बर गठित राज्य स्तरीय टास्क फोर्स के पहिली बैठक आज इहां योजना भवन म मुख्यमंत्री जी के सलाहकार अउ टास्क फोर्स के अध्यक्ष श्री विनोद वर्मा के अध्यक्षता म पूरा होइस। बैठक म छत्तीसगढ़ लोक कला मन के विकास अऊ कलाकार मन के कार्यक्रम, पुरातत्व, संग्रहालय अऊ पर्यटन ल बढ़ावा देहे, छत्तीसगढ़ के पारंपरिक व्यंजन मन बर गढ़कलेवा संग आन मुद्दा मन उपर टास्क फोर्स के सदस्य मन ह विस्तार ले अपन विचार प्रस्तुत करिन। बैठक म निर्णय लेहे गीस कि संस्कृति, कला, साहित्य पर्यटन अउ पुरातत्व के संवर्धन अउ विकास बर अलग-अलग वर्किंग ग्रुप गठित करे जाही।
टास्क फोर्स के बैठक म श्री विनोद वर्मा ह कहिन कि टास्क फोर्स कोति ले कला, संस्कृति, पुरातत्व अऊ पर्यटन के विसय म विशेषज्ञता रखइया मनखे मन अउ टास्क फोर्स के सदस्य मन के सुझाव के आधार म रिपोट तियार करके जरूरी सुझाव शासन के आगू प्रस्तुत करे जाही। बैठक म वीडियो कॉन्फ्रेंसिंग के संग जुड़े टास्क फोर्स के सदस्य अउ अध्यक्ष इंडिया एसोसिएट ऑफ टूर ऑपरेटर्स नई दिल्ली के श्री सुभाष गोयल ह छत्तीसगढ़ म पर्यटन, संस्कृति अउ पुरातत्व के संबंध म महत्वपूर्ण सुझाव दीन। अइसनहे ललित कला अकादमी दिल्ली के पहिली अध्यक्ष डॉ. कल्याण चक्रवर्ती ह घलोक ललित कला अउ कलाकार मन के संबंध म अपन सुझाव प्रस्तुत करिन। बैठक म इंडियन इंस्टीट्यूट ऑफ साईंस के कल्चर एक्सपर्ट डॉ. बितासा दास ह देश के कई ठन राज्य मन म लोक कलाकार मन के कार्यक्रम अउ कला संस्कृति के विकास बर होत विविध कार्यक्रम मन के बारे म विस्तार ले जानकारी दीन अऊ अपन सुझाव प्रस्तुत करिन।
बैठक म टास्क फोर्स के अध्यक्ष श्री विनोद वर्मा ह बताइस कि, छत्तीसगढ़ संस्कृति परिषद कोति ले साहित्य, ललित कला अउ आदिवासी लोक कला अकादमी के संचालक मन कोति ले कई कार्यक्रम मन के रूपरेखा तियार करके काम करे जाही। बैठक म श्री वर्मा ह छत्तीसगढ़ के कलाकार मन के कार्यक्रम के प्रस्तुति बर उचित मंच प्रदान करे म विशेष जोर दीन। बैठक म संस्कृति अउ पर्यटन विभाग के अधिकारी मन ह विभागीय कार्यक्रम अउ योजना मन के संबंध म विस्तृत जानकारी प्रस्तुत करिन। बैठक म कुलपति इंदिरा संगीत अउ कला विश्वविद्यालय अउ टास्क फोर्स के मेम्बर श्रीमती मोक्षदा (ममता) चंद्राकर, पुरातत्वविद श्री अरूण शर्मा, संस्कृति विभाग के संचालक श्री विवेक आचार्य संग पुरातत्व, संस्कृति पर्यटन अउ राज्य योजना आयोग के अधिकारी उपस्थित रहिन।