छत्तीसगढ़ के गांव के सरकारी स्कूल के पढ़ईया लईका मन के प्रोजेक्ट रहिस राष्ट्रीय स्तर म अव्वल

फसल मन के बीच म जामे कांदी-कचरा के पहिचान अऊ निदान म मिलही मदद
महासमुंद के नर्रा गांव के किसान बेटा मन ह आर्टिफिशियल इंटेलिजेंस उपर आधारित प्रोजेक्ट के करिन प्रदर्शन
महासमुंद, फसल मन के बीच म जामे कांदी-कचरा के पहिचान अऊ निदान म अब मिलही मदद काबर के महासमुंद के नर्रा गांव के किसान बेटा मन ह आर्टिफिशियल इंटेलिजेंस उपर आधारित प्रोजेक्ट के प्रदर्शन करे हें।
भारत सरकार के इलेक्ट्रॉनिक्स अऊ सूचना प्रौद्योगिकी मंत्रालय कोति ले आर्टिफिशियल इंटेलिजेंस उपर आयोजित प्रतियोगिता के जारी परिणाम म देश के टॉप 20 प्रोजेक्ट म छत्तीसगढ़ के पढ़ईया लईका मन के ये प्रोजेक्ट के चयन करे गए हे। राज्य के महासमुंद जिला के शासकीय कुलदीप निगम उच्चतर माध्यमिक विद्यालय नर्रा के छात्र वैभव देवांगन अऊ धीरज यादव येला तियार करे हें।
केन्द्रीय सूचना प्रौद्योगिकी मंत्री अश्वनी वैष्णव ह काली नई दिल्ली के भारतीय पर्यावास सेंटर म आयोजित समारोह म छत्तीसगढ़ के ए दुनों पढ़ईया लईका ल मेडल अऊ प्रमाण पत्र प्रदान करके सम्मानित करिन। ए पढ़ईया लईका मन भारतीय पर्यावास सेंटर नई दिल्ली म 29 अऊ 30 नवंबर के आयोजित प्रदर्शनी म अपन प्रोजेक्ट के प्रदर्शन करे रहिन। विजेता घोषित करे के पहिली प्रोजेक्‍ट के आर्टिफिशियल इंटेलिजेंस के विशेषज्ञ मन दूनों लईका मन ले ऑनलाईन इन्‍टरव्‍यू लीन। प्रदर्शनी के अवलोकन केन्द्रीय राज्यमंत्री सूचना प्रौद्योगिकी मंत्री श्री राजीव चंद्रशेखर ह घलोक करिस। ये बेरा म विभाग के सचिव अऊ डिजीटल इंडिया के सीईओ श्री अभिषेक सिंह अऊ आन अधिकारी मौजूद रहिन।
ये विद्यालय के व्याख्याता श्री सुबोध कुमार तिवारी ह लॉकडाउन के समय पढ़ईया लईका मन ल आर्टिफिशियल इंटेलिजेंस तकनीक ऑनलाईन पढ़ाए रहिस हे। पढ़ईया लईका मन ह ये तकनीक के उपयोग ले कृषि प्रधान राज्य के किसान मन के सुविधा बर प्रोजेक्ट बनाइन। ग्रामीण क्षेत्र म निवास करइया किसान पुत्र छात्र वैभव देवांगन अऊ धीरज यादव ह फसल के बीच उगे खरपतवार मन ल चिन्‍हें के सॉफ्टवेयर आर्टिफिशियल इंटेलिजेंस तकनीक के उपायोग ले बनाए हे।
आर्टिफिशियल इंटेलिजेंस उपर आयोजित प्रतियोगिता एक नजर म-
कुल 52 हजार 628 छात्र पंजीकृत होए रहिन। पहिली चरण म 11 हजार 466 पढ़ईया लईका मन ह प्रशिक्षण लीन। देश के 35 राज्य ले 2536 शिक्षक मन ह पहिली प्रशिक्षण लीन। पूरा देश ले 2441 पढ़ईया लईका मन अपन-अपन तरीका से 2704 आईडिया भेजिन। पहिली चरण के परिणाम 12 जनवरी 2021 को जारी करे गीस, जेमां दूसर चरण बर 125 पढ़ईया लईका के सूची जारी करे गीस। बाल दिवस के पहिली 13 नवम्बर के टॉप 60 के परिणाम के सूची जारी करे गीस, जेमां छत्तीसगढ़ राज्य के महासमुंद जिला के सरकारी स्कूल नर्रा के दू प्रोजेक्टों के चयन होइस। एखर बाद आज आखरी चरण म फायनल टॉप-20 म छत्तीसगढ़ के एक प्रोजेक्ट के चयन करे गीस।
जानबा हे कि सरकार के इलेक्ट्रॉनिक्स अऊ सूचना प्रौद्योगिकी मंत्रालय कोति ले आयोजित कार्यक्रम ए.आई. फॉर यूथ म देश के केवल सरकारी स्कूल के छात्र-छात्रा मन ल एकदम नवा आर्टिफिशियल इंटेलिजेंस तकनीक ले रू-ब-रू कराए अऊ ऊंखर कोति ले समाज के समस्या मन के आर्टिफिशियल इंटेलिजेंस (ए.आई.) के उपयोग ले समाधान खोजे बर ये कार्यक्रम चलाए गीस।