पीडब्ल्यूडी के काम मन बर अब नइ मिलय अकतहा समय, काम पूरा करे म देरी त अधिकारी मन उपर होही कार्रवाई – श्री अरुण साव

रायपुर, 16 जनवरी 2024। उप मुख्यमंत्री अऊ लोक निर्माण मंत्री श्री अरुण साव ह आज नवा रायपुर स्थित निर्माण भवन म विभागीय काम मन के समीक्षा करिन। उमन बैठक म अधिकारी मन ल सबो निर्माण काम मन ल समय-सीमा म गुणवत्ता के संग पूरा करे के निर्देश दीन। उमन कहिन कि विभाग कोति ले करे जात काम मन ल पूरा करे बर अब अकतहा समय नइ दे जाए। काम मन ल हर हाल म निरधारित समय म पूरा करना होही। उमन कहिन कि काम पूरा करे म देरी होही त संबंधित अधिकारी के जवाबदेही तय करके कार्रवाई करे जाही। उमन काम पूरा करे म आवत दिक्कत के लउहे समाधान करके काम आगू बढ़ाय ल कहिन। लोक निर्माण विभाग के सचिव डॉ. कमलप्रीत सिंह, प्रमुख अभियंता श्री के.के. पीपरी, ओएसडी श्री वी.के. भतप्रहरी, उप सचिव श्री एस.एन. श्रीवास्तव, वित्त नियंत्रक श्री बी.के. लाल अऊ विभाग के सबो मुख्य अभियंता, अधीक्षण अभियंता अऊ कार्यपालन अभियंता समीक्षा बैठक म मौजूद रहिन।