कोरोना काल म ड्यूटी म डटे एसडब्लूसी कर्मचारी मन ल वोरा ह दीस सौगात

कई बछर के जुन्ना वेतनमान बढ़ोतरी के मांग घलोक होइस पूरा

दुर्ग, 30, अगस्त 2020। छत्तीसगढ़ राज्य भंडारगृह निगम के अध्यक्ष पद संभालतेच दुर्ग विधायक अरुण वोरा ह कारपोरेशन के कर्मचारी मन ल बड़का सौगात देहे हें। लॉकडाउन के बेरा म कोरोना संकट के बीच पीडीएस योजना अऊ भंडारगृह के कामधाम ल बने सहिन चलइया अधिकारी कर्मचारी मन ल एक महिना के तनखा म 10 प्रतिशत अकतहा बोनस देहे के निर्णय ले गए हे। एकरे संग 10 साल के नौकरी पूरा कर डरे 39 कर्मचारी मन ह अड़बड़ दिन ले जउन वेतनमान वृद्धि के मांग करत रहिन वो ह घलोक वोरा के पहल पूरा कर दे गए हे। जेखर अंतर्गत भंडारगृह के तकनीकी सहायक कर्मचारी मन ल अब 5200-20200 ग्रेड पे 2800 के जगा म 9300-34800 ग्रेड पे 4300 के निर्धारण कर दे गए हे। अड़बड़ दिन के मांग उदुपहा पूरा होए म कर्मचारी मन बिकटे खुश हें। उमन वेयर हाउसिंग कारपोरेशन के अध्यक्ष वोरा ल धन्यवाद ज्ञापित करे हें। श्री वोरा ह अधिकारी मन के हौसला अफजाई करत कहिन के देश कोरोना महामारी के रूप म भीषण आपदा के सामना करत हे अइसन समय म गरीब मन के पीडीएस चांउर अउ आन जरूरी सामान मन के उपलब्धता सुनिश्चित करे भंडारगृह म सुरक्षित रखे बर आश्यकता मुताबिक इहाँ-उँहा म पहुंचाए म निगम के कर्मचारी मन ह कर्तव्य स्थल म उपस्थित रहि के अपन दायित्व निभाए हें, ये सहराये के बात हे।
जानबा हे के भंडारगृह निगम के पहिलीच बैठक म अध्यक्ष वोरा ह कर्मचारी मन के मांग पूरा करे अऊ वेतन अऊ पदोन्नति के विसंगति दूर करे के हुकुम देहे रहिन।