चिंताराम के बेटा आशीष गिरफ्तार

रायपुर, प्रार्थी दिलीप जांगडे ह थाना तेलीबांधा म रिपोट दर्ज कराए रहिस के वो ह एण्टी क्राईम एण्ड साईबर यूनिट म आरक्षक के पद म पदस्थ हे। प्रार्थी एण्टी क्राईम एण्ड साईबर यूनिट टीम के आन सदस्य मन के संग ईनोवा गाड़ी म आरोपी पता तलाश अउ अपराध विवेचना म उड़ीसा जात रहिस। उही बेरा म गौरा – गौरी चौंक तिर लड़ई झगरा होत रहिस तेला समझाईस देहे बर उतरिस अउ झगड़ा छोड़ाए के उदीम करत रहिस। उही बेरा म झगरा करइया मन म ले तेलीबांधा निवासी आशीष कश्यप अऊ ओखर 08 – 09 आन साथी प्रार्थी ल घेरके हाथ, मुक्का, कड़ा अउ डण्डा ले मारपीट करके चोट पहुंचाइन अऊ संगेच शासकीय काम म बाधा पहुंचाइन अऊ भाग गीन।
खबर के मुताबिक ए बात म आरोपी मन के विरूद्ध थाना तेलीबांधा म अपराध नंबर 594/22 धारा 147, 148, 149, 353, 332, 186 भादवि. के अपराध पंजीबद्ध करे गीस। वरिष्ठ अधिकारी मन के निर्देशन म एण्टी क्राईम अउ साईबर यूनिट अऊ थाना तेलीबांधा पुलिस के टीम घटना म संलिप्त आरोपी मन के पतासाजी करना चालू करिस। फरार आरोपी मन के लुकाए के हर संभावित जगा मन म लगातार रेड कार्यवाही करे जात रहिस इही दौरान फरार आरोपी आशीष कश्यप के बारे म पता चलिस अउ गिरफ्तार करे गीस अऊ जेल भेज दे गीस। प्रकरण म संलिप्त आन फरार आरोपी मन के सरलग पतासाजी करके गिरफ्तार करे के उदीम करे जात हे।