थानेदार ह आरोपी ल छोड़े बर मांगिस घूस, अपनेच पकड़ाईस होगे सस्पेंड

धमतरी, 24 मई 2024। धमतरी म एक एएसआई घूस लेत कैमरा म कैद हो गे। एसपी आंजनेय वार्ष्णेय ह मामला ल संज्ञान म लेत, एसआई ल निलंबित कर देहे हे। जानबा हे के  धमतरी सिटी कोतवाली म एक मारपीट के मामला म ये लेनदेन के बात आगू आए हे। मारपीट के आरोपी ल मुचलका म छोड़े के बात म एएसआई ह घूस के मांगे रहिस। ये लेन-देन साढ़े चार हजार रुपए म तय होय रहिस। पइसा देवइया पक्ष ह खुद ए लेन-देन के वीडियो बनवाइस अऊ ए पूरा मामला के शिकायत धमतरी एसपी आंजनेय वार्ष्णेय ल करिस। प्रमाण के तौर म वीडियो घलोक देहे गीस। धमतरी एसपी ह मामला ल संज्ञान म लीन,  बताए जात हे कि एएसआई रमेश साहू ल तुरंते निलंबित कर दे गीस। अवइया दिन म वोखर खिलाफ विभागीय जांच घलोक करे जाही।