खेल मंत्रालय ह एसियाई खेल मन के पहिली स्वर्ण पदक विजेता जोसेफ जेम्स ल ढ़ाई लाख रूपिया के सहायता ल मंजूरी दीस

दिल्‍ली, 18 मई 2021। युवा कार्यक्रम अऊ खेल मंत्रालय (एमवाईएएस) ह खिलाड़ी मन बर बनाय गए पंडित दीनदयाल उपाध्याय राष्ट्रीय कल्याण कोष के तहत अंतरराष्ट्रीय पावरलिफ्टिंग कोच जोसेफ जेम्स बर 2,50,000 रूपिया के राशि ल मंजूरी देहे हे। ये वित्तीय सहायता कोविड-19 के बीच भारतीय खेल प्राधिकरण (साई), भारतीय ओलंपिक संघ अऊ मंत्रालय के संघरा सहयोग के तहत पूर्व-अंतर्राष्ट्रीय खिलाड़ी अऊ कोच के मदद बर देहे जाथे।
2006 के एसियाई खेल के स्वर्ण पदक के विजेता अऊ 2008 म एसियाई पावरलिफ्टिंग चैंपियनशिप म स्वर्ण पदक जीतइया जोसेफ जेम्स ल कुछ दिन पहिली कोविड-19 संक्रमण होए के बाद 24 अपरेल के सांस लेहे म गंभीर समस्या हो गीस। वोखर ऑक्सीजन के स्तर कम रहिस अऊ परिवार ह ओ ल तुरंत हैदराबाद के विवेकानंद अस्पताल म भर्ती कराइस। वो सात-आठ दिन बर आईसीयू म रहिस अऊ पांच मई के ओ ल अस्पताल ले छुट्टी दे देहे गीस। वोखर हालत अब स्थिर हे अऊ वो घर म सब सदस्य मन ले अलग रहत हे।
जोसेफ जेम्स के बेटी ऐलिसा जऊन ह समय म वित्तीय मदद देहे बर मंत्रालय, साई अऊ भारतीय ओलंपिक संघ के आभार जतात कहिस, “तेलंगाना ओलंपिक संघ अऊ भारतीय ओलंपिक संघ के सदस्य मन म ले एक, श्री महेश सागर ह हमला ये पहल के बारे म बताइस। उमन मोला आवेदन भरे बर विवरण दीस अऊ संबंधित अधिकारी मन के संग बातचीत कराईस।
अइसन समय म मंत्रालय ले मिले ये सहायता सिरतोन म बहुत बड़े मदद ये जब हमार परिवार अऊ दोस्त मन ले मदद प्राप्त करना घलोक मुश्किल हे। मैं आभारी हंव के भारतीय खेल प्राधिकरण ह हमला तब सुरता करिस जब हमार जरूरत रहिस।”