अस्पताल मन म सुगमता ले इलाज अउ आगजनी के घटना थाम्हे बर पोठ प्रबंध होवय : मुख्यमंत्री दाउ भूपेश बघेल

रइपुर, 25 अप्रैल 2021 इतवार। मुख्यमंत्री दाउ भूपेश बघेल रायपुर अउ दुरूग संभाग के जम्मो नगर पालिका परिषद के अध्यक्ष अउ मुख्य नगर पालिका अधिकारी मन संग संघरा बइठका लेके कोरोना संक्रमण के नवा स्थिति अउ बचाव के उपाय मन के समीक्षा करीन। आज मुख्यमंत्री घरू कार्यालय ले आयोजित वीडियो कॉन्फ्रेंसिंग म नगरीय प्रशासन मंत्री डॉ. शिव कुमार डहरिया, मुख्य सचिव श्री अमिताभ जैन, मुख्यमंत्री के सचिव श्री सिद्धार्थ कोमल सिंह परदेशी, नगरीय प्रशासन विभाग के सचिव श्रीमती अलरमेलमंगई डी. अउ नगर पालिका परिषद के अध्यक्ष अउ अधिकारी मन संघरीन।
दाउ बघेल ह नगर पालिका परिषद मन मं कोरोना संक्रमण के स्थिति के समीक्षा करत कहीन कि वर्तमान म हमन सबो वैश्विक महामारी कोविड-19 के सेति कठिन दौर ले गुजरत हावन ं। सबोके सहयोग ले एला लउहे ले लउहे हरोना हे। उनमन कोरोना संक्रमण के रोकथाम अउ मरीज मन के सुगमता ले इलाज बर अस्पताल मन म ढंगलगहा प्रबंधन के संगे -संग ऑक्सीजन बिस्तर अउ आवश्यक दवई मन के पर्याप्त उपलब्धता सुनिश्चित करे के निर्देश दीन । अभीन कोरोना संक्रमण के दौर चलत हे अइसन हालात म कोनो भी मनखे ल सर्दी, जुकाम अउ बुखार होए म वो तुरते जांच करावयं अउ दवा प्रारंभ कर देवयं। जेकर ले बीमारी ल को बाढे अउ गंभीर स्थिति जइसन हालात ल समय रहीते रोके जा सकत हे।
दाउ बघेल ह समीक्षा करत नगरीय निकाय मन के हरेक गली-मोहल्ला मन सरलग साफ-सफई अउ कचरा के निपटान कड़क हुकुम दीन। ये बेरा म दौरान नगरीय निकायं के सबो गली-मोहल्ला मन म सरलग भ्रमण करके येहू निगरानी रखे बर निर्देशित करीन कि उहां लोगन मन के भीड़ झन होवय अउ कोरोना के संक्रमण फैल झन पावय।
मुख्यमंत्री दाउ बघेल ह समीक्षा के दौरान अस्पताल मन म सुगमता ले इलाज अउ आगजनी के घटना मन ल थाम्हे बर पोठ प्रबंध सुनिश्चित करे बर तको निर्देश दीन। मरीज मन ल इलाज बर थोरको दिक्कत झन होवय। उन्कर सहूलियत बर गँवई क्षेत्र मन तको हरेक ग्राम पंचायत स्तर म ऑक्सीमीटर अउ दवई मन के पर्याप्त उपलब्धता बर कहीन। जेकर ले मरीज आवश्यकतानुसार एकर तुरते उपयोग कर सकही, जउन ह बीमारी ल बाढे ले थाम्हे म अबड़ कारगर होही।
कारोना संकट काल म राज्य के सार्वजनिक वितरण प्रणाली उपभोक्ता मन ल मई अउ जून महीना के राशन एके संघरी मुफ्त उपलब्ध कराय जाय, ताकि जरूरतमंद लोगन मन ल राशन अउ आवश्यक सामग्री मन बर कोनो किसम के दिक्कत झन होवय।