गुवाहाटी म छत्तीसगढ़ टूरिज्म बोर्ड ह रखे रहिस मीटिंग
रायपुर, 18 फरवरी 2021। छत्तीसगढ़ म पर्यटन उद्योग ल बढ़ावा देहे के उद्देश्य ले मुख्यमंत्री श्री भूपेश बघेल ह असम के टूर ऑपरेटर्स, ट्रैवल एजेंट्स अऊ होटल-उद्यमी मन ल छत्तीसगढ़ म निवेश बर आमंत्रित करे हें। आज असम के राजधानी गुवाहाटी म छत्तीसगढ़ टूरिज्म बोर्ड कोति ले आयोजित बी-टू-बी मीटिंग म ये बातचीत होइस। मुख्यमंत्री श्री बघेल ह असम टूरिज्म इंडस्ट्री ले जुड़े मनखे मन ल छत्तीसगढ़ के पर्यटन स्थल मन के विशेषता, इंकर प्रचार-प्रसार बर राज्य सरकार कोति ले करे जात प्रयास अऊ पर्यटन-नीति के बारे म जानकारी दीन।
मुख्यमंत्री श्री बघेल ह बैठक म आमंत्रित असम राज्य के होटल अऊ ट्रैवल एजेंसी ले जुड़े पदाधिकारी अऊ सदस्य मन ल छत्तीसगढ़ म पर्यटन के असीम संभावना मन के बारे म बताइन। उमन कहिन के छत्तीसगढ़ म पर्यटन के प्रचार-प्रसार अऊ विकास बर निवेश करइया ल राज्य सरकार कोति ले हर जरूरी मदद देहे जाही।
जानबा हे के राज्य म पर्यटन ल बढ़ावा देहे बर नवा पर्यटन नीति म टूर ऑपरेटर, ट्रैवल एजेंसी, उद्यमी अऊ होटल इंडस्ट्री ले जुड़े मनखे मन बर बहुत अकन आकर्षक प्रावधान करे गए हे। स्थानीय व्यवसायी के संगें-संग आन राज्य के व्यवसायी मन ल घलोक इहां निवेश बर प्रोत्साहित करे जात हे। नवा नीति म निजी, सामुदायिक अउ सार्वजनिक भागीदारी के रणनीति अपनाए गए हे। पर्यटक मन के सबो जरूरी सुविधा मन बर नवा अधोसंरचना विकसित करे जात हे। राज्य म ट्राइबल टूरिज्म सर्किट के निर्माण, होम स्टे प्रणाली के स्थापना अऊ गाइड ट्रेनिंग प्रोग्राम जइसे नवाचार घलोक करे जात हे। राम वन गमन पर्यटन परिपथ के विकास के अंतर्गत 1120 किलोमीटर लंबा रस्ता म नवा पर्यटक स्थल मन के विकास करे जात हे। योजना के पहिली चरण म भगवान राम के वनवास काल ले जुड़े 9 जगा मन के चयन करके ओ मन ल पर्यटन-तीर्थ के रूप म विकसित करे जात हे। ये पूरा परिपथ म राज्य के 17 जिला मन ल सामिल करे गए हे। ये परिपथ के निर्माण ले भविष्य म छत्तीसगढ़ अवइया पर्यटक मन ल छत्तीसगढ़ के प्राचीन संस्कृति अऊ परंपरा के दर्शन होए के संग विश्व स्तर के पर्यटन सुविधा घलोक प्राप्त हो सकही।
छत्तीसगढ़ टूरिज्म बोर्ड कोति ले गुवाहाटी म आयोजित ये बी-टू-बी मीटिंग म असम के टूर ऑपरेटर्स एसोसिएशन के अध्यक्ष श्री रंजीत दास, होटल अउर रेस्टोरेंट्स एसोसिएशन के अध्यक्ष श्री सुनील सराफ, सचिव, प्रणब दास, कार्यकारिणी सदस्य रोज़ा रहमान, अज़ाना रहमान अऊ रूपम वोहरा के संगें-संग होटल अऊ ट्रैवल इंडस्ट्रीज के 30 ले जादा पदाधिकारी अउर सदस्य घलोक उपस्थित रहिन।
