विधानसभा अध्यक्ष मुख्यमंत्री शिक्षा गौरव अलंकरण समारोह म होइन सामिल
जिला के 30 शिक्षक मन ल ज्ञानदीप पुरस्कार अउ शिक्षा दूत पुरस्कार ले करे गीस सम्मानित
राजनांदगांव, 05 सितमबर 2024। भारत के पहिली उप राष्ट्रपति अउ दूसरइया राष्ट्रपति डॉ. सर्वपल्ली राधाकृष्णन के जन्मदिवस ल ‘शिक्षक दिवस‘ के रूप म मनाए जाथे। राजनांदगांव म शिक्षक दिवस के अवसर म विधानसभा अध्यक्ष डॉ. रमन सिंह ह पद्मश्री गोविंदराम निर्मलकर ऑडिटोरियम म आयोजित मुख्यमंत्री शिक्षा गौरव अलंकरण समारोह म सामिल होइन। कार्यक्रम के अध्यक्षता सांसद श्री संतोष पाण्डे करिन। विधानसभा अध्यक्ष डॉ. रमन सिंह ह अपन उद्बोधन म कहिन कि 5 सितमबर के विशेष दिन शिक्षक दिवस के रूप म भारत के पहिली राष्ट्रपति डॉ. सर्वपल्ली राधाकृष्णन के सुरता म मनाए जाथे। जेमन भारत के शिक्षा प्रणाली ल दिशा देहे रहिन। उंखर इही सोच अऊ कल्पना के संग ऊंखर जन्मदिवस ल शिक्षक दिवस के रूप म मनाया जाथे। शिक्षा के दीपक अज्ञानता के अंधकार ल दूर करथे अऊ हर युग के निर्माण म बदलाव बर हम जिनला आराध्य मानथन उनला शिक्षक मार्गदर्शन देथे। भगवान श्रीराम ल गुरू वशिष्ठ के आश्रम म शिक्षा-दीक्षा मिलीस, भगवान श्री कृष्ण ह विश्व ल गीता के ज्ञान दीन। ओ मन ल घलोक ऋषि संदीपनी के आश्रम म शिक्षा मिलीस। शिक्षक युग ल बदलथे। चाणक्य ह चंद्रगुप्त मौर्य ल शिक्षा देके हिन्दुस्तान के नक्शा बदल दीस। गुरू द्रोणाचार्य ह अर्जुन ल अइसन शिक्षा दीन, जेन हिन्दुस्तान के अद्भुत घटना माने जाथे। स्वामी विवेकानंद के गुरू श्री रामकृष्ण परमहंस ह ऊंखर जीवन म महत्वपूर्ण बदलाव करिन। छत्तीसगढ़ के संदर्भ म देखन त पंडित रविशंकर शुक्ल ह शिक्षक रहत अपन अमूल्य सेवा दीन। राजनांदगांव म गुरू के गौरवशाली परंपरा रहे हे। देश अऊ दुनिया म एखर कीर्ति-पताका फैले हे। जिला के महान साहित्यकार डॉ. पदुमलाल पुन्नालाल बख्शी, डॉ. गजानन माधव मुक्तिबोध, डॉ. बल्देव प्रसाद मिश्र दिग्विजय महाविद्यालय म गवाह रहे हें अउ श्रेष्ठतम साहित्यकार के रूप म आगू बढ़े हें।
विधानसभा अध्यक्ष डॉ. रमन सिंह ह मुख्यमंत्री शिक्षा गौरव अलंकरण समारोह म जिला के 30 शिक्षक मन ल ज्ञानदीप पुरस्कार अउ शिक्षा दूत पुरस्कार ले सम्मानित करिन। जिला शिक्षा अधिकारी श्री अभय जायसवाल ह घलोक कार्यक्रम ल संबोधित करिन। ए बेरा म पूर्व सांसद श्री मधुसूदन यादव, उपाध्यक्ष जिला पंचायत श्री विक्रांत सिंह, अध्यक्ष जनपद पंचायत राजनांदगांव श्रीमती प्रतीक्षा भंडारी, अध्यक्ष जिला सहकारी केन्द्रीय बैंक मर्यादित राजनांदगांव श्री सचिन बघेल, श्री खूबचंद पारख, श्री नीलू शर्मा, श्री रमेश पटेल, श्री संतोष अग्रवाल, श्री अशोक देवांगन आन जनप्रतिनिधि, कलेक्टर श्री संजय अग्रवाल, पुलिस अधीक्षक श्री मोहित गर्ग, वनमंडलाधिकारी श्री आयुष जैन, जिला पंचायत सीईओ सुश्री सुरूचि सिंह संग बड़ संख्या म शिक्षक अउ आम नागरिक उपस्थित रहिन।