झारखंड के मुख्यमंत्री ह ट्वीट म मुख्‍यमंत्री भूपेश ले मांगिंन सहायता

बीबीसी संवाददाता आलोक पुतुल के उदीम म बिलासपुर म फंसे झारखंड के मजदूर मन ल चिटिकन बेरा म ही मुख्यमंत्री के हुकुम म होइस खाए-पीए के इंतजाम अउ घर जाय के व्यवस्था घलोक कराइन

रायपुर, 24 मार्च 2020। बीबीसी संवाददाता आलोक पुतुल ल जब महाराष्ट्र ले लहुटत झारखंड के 50 ले जादा मजदूर बिलासपुर म फंसे होए के जानकारी मिलिस त उमन झारखंड के मुख्यमंत्री हेमंत सोरेन अउ मुख्यमंत्री भूपेश बघेल ल ट्वीट करके ऊंखर बर सहायता के मांग करे रहिन। उन लिखे रहिन के रेल बंद होए के सेती ऊंखर आए-जाए के कोनो व्यवस्था नइ हो पात हे, अउ उमन ल खए-पिए के तको समस्‍या होवत हे।

आलोक पुतुल के ट्वीट के जरिये झारखंड के मुख्यमंत्री हेमंत सोरेन ल ये बात के सूचना जब मिलीस तब उमन ट्वीट करके मुख्यमंत्री भूपेश बघेल ले निवेदन करिन के मजदूर मन के सहायता करव, संगेच उंखर लोकेशन घलोक मांगिन, ताकि ऊंखर बर सहायता भेजे जा सकय। तेकर पाछू बिलासपुर म फंसे झारखंड के मजदूर मन बर मुख्यमंत्री भूपेश बघेल के हुकुम म सहायता पहुचाए गीस।